Álvarez-Cascos quier construyir “una Asturies con oportunidaes reales d’emplegu y de prosperidá”

Francisco Álvarez-Cascos fixo esti xueves en Cuadonga’l so primer discursu como presidente del país nun Día d’Asturies. El llíder de FAC señaló que quier construyir “una Asturies con oportunidaes reales d’emplegu y de prosperidá”.
 
El presidente nacional instó a trabayar en comuña ante unes circunstancies “esceicionales”, caracterizaes por “l’estancamientu del crecimientu, les tases altes de paru y el deterioru de los niveles de bienestar”. Tamién fixo una llamada “clamorosa, rotunda y hasta angustiosa” a dir “toos xuntos na direición bona”.
 
Tres aniciar la so intervención con un recuerdu especial a los emigrantes asturianos, el xefe del Executivu invitó a toos a mantenese lloñe del pesimismu y de la frivolidá porque “ye precisamente nos momentos difíciles onde se fragüen y consoliden les ferramientes morales más auténtiques, como l’amor a la verdá, la solidaridá, la capacidá d’iniciativa y el compromisu con una distribución xusta de la riqueza”.
 
Por último, Álvarez-Cascos espresó’l so deseu de que la fiesta de Cuadonga y el Día d’Asturies reactiven el propósitu de tolos asturianos de “redoblar los sos esfuerzos y multiplicar la so xenerosidá pa superar cuanto antes les dificultaes presentes, y pa construyir proyeutos nuevos d’esperanza na Asturies nueva”. “Una Asturies más solidaria; una Asturies más acoyedora y abierta al mundu; con oportunidaes reales d’emplegu y de prosperidá pa toos”, concluyó.