Rafael Fernández Álvarez, a títulu póstumu, y Alberto Aza reciben esti miércoles la medaya d’oru d’Asturies

L’Auditoriu Príncipe Felipe va ser sede, esti miércoles, de la entrega de les medayes d’oru y plata d’Asturies. El país da la so distinción máxima a Rafael Fernández Álvarez, a títulu póstumu, y a Alberto Aza Arias.
 
L’uviedín Fernández Álvarez, que finó nel mes d’avientu a los 97 años, foi dirixente de la Federación Socialista Asturiana (FSA) y formó parte na Guerra Civil del Conseyu Soberanu d’Asturies y Lleón. Tres el so regreso a Asturies tres un exiliu llargo en México, ocupó’l cargu de presidente del Consejo Regional de Asturias y, cola aprobación del Estatutu d’Autonomía, foi’l primer presidente d’Asturies, cargu que mantuvo hasta les primeres eleiciones autonómiques del 1983. Amás, Fernández Álvarez foi senador ente 1977 y l’añu 2000.
 
Pela so parte, Alberto Aza Arias (Tetuán, 1937) ye diplomáticu y tuvo, ente otros destinos, el d’embaxador del Estáu en Belice, México y Reinu Xuníu, amás del cargu de direutor xeneral de la Oficina de Información Diplomática. Tamién foi secretariu xeneral de la Casa del Rey ente setiembre y avientu del 2002 y, dende esa fecha última, ye xefe de la Casa.
 
Seis de plata y tres fíos predileutos
 
Les seis medayes de plata qu’entrega’l Gobiernu d’Asturies nesta ocasión son pa Emilio Llamedo Olivera (presidente del Comité Organizador del Seya) y Juan Luis de la Vallina Velarde (ex presidente de la Diputación Provincial y presidente d’Alianza Popular n’Asturies), a títulu póstomu; amás de pa Blanca Álvarez Pinedo (ex direutora del Archivu Históricu d’Asturies), Emilio García-Pumarino Ramos (ex presidente d’UCD n’Asturies), Gerardo Iglesias Argüelles (ex secretariu xeneral del PCE y fundador y primer coordinador xeneral d’Izquierda Xunida) y Jesús Sanjurjo González (primer secretariu de la FSA).
 
Otra manera, van recibir el títulu de fíos predileutos d’Asturies José Ramón Álvarez Rendueles (ex presidente de la Fundación Príncipe), Juan Cueto Sierra (empresariu) y José Antonio Nespral Tirador (presidente del Centru Asturianu de Buenos Aires).