La Pola Ḷḷena y Uviéu acueyen los actos políticos del Día d'Asturies de los partíos asturianistes

Bloque por Asturies-UNA va celebrar el Día d'Asturies en La Pola Ḷḷena con un actu políticu, mentes que Conceyu Abiertu entama una manifestación n’Uviéu. Otra manera, Amieva va acoyer les actividaes organizaes pol Gobiernu.
 
Ḷḷena, ún de los conceyos onde Bloque por Asturies-Unidá Nacionalista Asturiana (UNA) tien representación municipal, foi’l llugar escoyíu pola coalición pa celebrar el 8 de setiembre. La xornada festiva va principiar a les 13 hores con un actu políticu na plaza Alfonso X presentáu pol conceyal Agripino Pérez nel que van intervenir Yolanda Huergo y Rafael Palacios. Darréu, va tener llugar una xinta popular que va tar amenizada por música y xuegos tradicionales. Bloque-UNA esperan con esta cita dar entamu a una axenda de trabayu pa echar a andar una plataforma qu’axunte a tol asturianismu, iniciativa que lleva’l nome de ‘Xente con compromisu’.
 
Pela so parte, Conceyu Abiertu, candidatura de xunidá popular creada esti añu, vive’l so primer Día d’Asturies con una manifestación n’Uviéu que va salir a les 13 hores de la Estación del Norte, p’acabar frente a la Xunta Xeneral. Ésta va tar encabezada con una pancarta col lema ‘Soberanía y xusticia social. Más Asturies, menos España’ y tien el sofitu d’Andecha Astur, Darréu y l’Asociación Cultural N’Ast. “Nun contestu de recorte de derechos sociales y políticos nel Estáu español –reforma llaboral, reforma constitucional, reforma de la llei ellectoral…–, y nun momentu onde'l rexonalismu asturianu gobierna'l 'Principado' col so ‘Más Asturias, mejor España’, ye imprescindible la vindicación de la soberanía, l'autodetermín, el derechu a decidir, la democracia direuta y participativa y la xusticia social. Más tovía'l 8 de setiembre, el Día de la Nación Asturiana”, señala la formación asturianista. Tres l’actu políticu, va celebrase una espicha en Paraxuga.
 
Chus Pedro n’Amieva
 
L’actuación de Chus Pedro, a les 20.30 hores, va ser l’actividá estrella de la programación del Día d’Asturies entamada pol Gobiernu, qu’esti añu, tres el cambiu nel Executivu, van reducise a una xornada. Nesta ocasión, la fiesta del Día d’Asturies va celebrase n’Amieva, nel área recreativa de Trambesagües, onde va instalase un mercáu tradicional con mediu centenar de puestos artesanales que van permanece abiertos al públicu de 12 a 22 hores. Nel mesmu horariu va celebrase una Feria de Productos Asturianos y una esposición sobre los quesos de Denominación d’Orixe Protexida Gamonéu y Cabrales, y de la Indentificación Xeográfica Protexida Quesu de los Beyos.
 
Nel aspeutu musical, l’Asociación d’Interpretes de la Canción Asturiana va actuar de 12 a 14 hores, mentes que la zona infantil de la folixa va tar amenizada de 12 a 14 hores y de 17 a 19 hores, por música tradicional asturiana. La tonada va repetir protagonismu de 17 a 19 hores, nesta ocasión de la mano de l’Asociación de la Canción y el Folklore Valle del Nalón.
 
Tamién va haber sitiu n’Amieva pa los deportes tradicionales. El Club Deportivu 6 Conceyos va facer una muestra de deportes y convida a tolos visitantes, tanto grandes como pequeños, a disfrutar d’ellos práuticándolos xuntos colos deportistes del club n’horariu de 12 a 21 hores. Mentes, de 17 a 19 hores, el Club Deportivu Básicu Los Amigos, cola collaboración d’otres agrupaciones, va realizar una exhibición de delles disciplines deportives. Por último, a les 18 hores ta prevista otra exhibición, nesta ocasión d’escanciadores, na que van participar los meyores echadores de sidra del país.