Iglesias anuncia qu’IX-LV va vivir un Día d’Asturies “reivindicativu”

IX-LV va celebrar el Día d’Asturies con un actu “reivindicativu” en Mieres “colos güeyos puestos nuna realidá difícil”, según anunció Jesús Iglesias. Cayo Lara, coordinador estatal de la coalición, va tar presente nes actividaes previstes.
 
Nuna rueda de prensa, na que’l coordinador nacional d’Izquierda Xunida (IX) tuvo acompañáu pol so homólogu en Mieres, Luis Álvarez, y pola representante de Los Verdes d’Asturies (LV) Olga Álvarez, Iglesias presentó les actividaes previstes pal 8 de setiembre en Mieres y aprovechó la ocasión pa cargar contra la “inaición” del Gobiernu de Francisco Álvarez-Cascos, criticando la so falta de compromisu pa con Asturies. Tamién acusó la dificultá del Executivu pa completar la so estructura, con responsabilidades “ensin axudicar”, asina como la mengua “cosmética” d’altos cargos, lo qu’a xuiciu d’Iglesias evidencia que “la estructura del Gobierno anterior nun taba en nengún casu hinchada”.
 
Per otru lláu, el coordinador d’IX reprochó’l pocu enfotu de Foro Asturias Ciudadano (FAC) na defensa de los intereses del país frente a los recortes anunciaos pol Gobiernu estatal en llugar de pedir que cumpla coles inversiones comprometíes p’Asturies. Na so opinión, la iniciativa principal del Gobiernu d’Álvarez-Cascos foi “reducir el sector públicu asturianu pa tener recursos”, al igual que l’alcalde d’Uviéu, Gabino de Lorenzo, fixo cola venta del patrimoniu de la capital. Iglesias tamién aprovechó pa criticar l’aventura madrilana de FAC que “ratifica la renuncia del so carauter rexonalista supuestu”.
 
Por último, cargó contra la coalición llocal, nacional y estatal ente’l PP y el PSOE que convirtió a Asturies en precursora del “gran alcuerdu” ente los dos grandes partíos pa una “reforma express” de la Constitución, ensin referéndum. D’esti mou, y pese a opinar que “el cuerpu nun ta pa munches fiestes”, IX-LV va centrar esti xueves nel Licéu de Mieres, a partir de les 13 hores, los actos festivos del Día d’Asturies, que va consistir nes intervenciones d’Aníbal Vázquez, alcalde de Mieres; Ignacio González García, voceru de Los Verdes; Jesús Iglesias, coordinador nacional d’IX; y Cayo Lara, coordinador estatal d’IX. Tres esti eventu, va celebrase una ‘arrozada popular’.