La sidra d’escoyeta llega al millón de botelles certificaes nesta campaña

Esti llunes celebróse la cabera mesa de preba de sidra d’escoyeta d’esta campaña, onde superóse’l millón de botelles certificaes col sellu de calidá d’esta bébora. La cifra ye un ésitu nun añu d’escasez de mazana n'Asturies.
 
La sidrería La Chalana, en Xixón, foi’l sitiu escoyíu pa facer esta preba nel que dellos espertos califiquen la sidra de los toneles presentaos polos llagares qu’ellaboren esta bébora fecha con venti variedaes de mazana autóctona: Trabanco, Peñón, Foncueva y Muñiz. Namái aquella sidra que llega al notable pue llevar la contraetiqueta de la sidra d’escoyeta. Nesta ocasión, pese a ser una collecha escasa en mazana autóctona, consiguióse superar el millón de botelles, una cifra que l’Asociación de Llagareros de Sidra de Mazana Seleicionada considera un ésitu. “Superar el millón de botelles esti añu foi un retu dada la escasez de materia prima. Sicasí, conseguimos superar esta marca nun añu importante pa nós, yá que tamos ante la Collecha X Aniversariu d’esti certificáu de calidá, el primeru del sector de la sidra en toda España”, explica Samuel M. Trabanco, presidente del coleutivu de llagareros.
 
Estes cifres altes de producción coinciden tamién con un récor del consumu d’esta sidra. Según datos que manexa l’Asociación de Llagareros de Sidra de Mazana Seleicionada, n’abril y los primeros díes de mayu yá se consumieren 200.000 botelles de sidra procedente de toneles ensin trasiegar. “Les actividades de promoción venceyaes al X Aniversariu contribuyeron a impulsar el reconocimientu de la sidra de mazana seleicionada por parte del consumidor. De ahí que, nel primer mes nel mercáu, se consumiesen más de 200.000 botelles y que’l ritmo de ventes fora mui superior al de colleches anteriores”, esplica Trabanco, que destaca la entrada d’esta bébora d’escoyeta en mercaos internacionales nuevos, como Australia, y la so presencia en Estaos Xuníos y Alemaña.