Bloque-UNA quier echar a andar el 8 de setiembre una plataforma p'axuntar a tol asturianismu
|
6 Setiembre, 2011 por Pablo R. Guardado
- Inicie sesión o rexístrese pa espublizar comentarios
La celebración del Día de la Nación Asturiana en La Pola Ḷḷena va ser l’aniciu d’una axenda de trabayu col que’l Bloque por Asturies-UNA quier axuntar a tol asturianismu. La coalición noma a esta iniciativa como ‘Xente con compromisu’.
La intención de los representantes de Bloque por Asturies y Unidá Nacionalista Asturiana (UNA) ye tresformar la coalición eleutoral nuna estructura que permita xenerar un espaciu políticu de futuru na que participen, amás de les dos formaciones, toes aquelles persones y coleutivos qu'amosaron la so disposición a participar nesti proyeutu enantes, mientres y depués de les eleiciones. Según confirma la vocera de la coalición, Yolanda Huergo, en La Pola Ḷḷena “nun vamos presentar una propuesta o una iniciativa zarrada, sinón un marcu abiertu porque esti procesu tien que cuntar, dende la base, amás de con Bloque y UNA, con otres persones y sectores que tienen que tener voz y votu”.
“Na campaña eleutoral esplicamos que'l nuesu alcuerdu nun yera puramente electoral y que'l so horizonte superaba les eleiciones del 22 de mayu, polo qu'agora llega'l momentu d'empecipiar esa nueva etapa, recuperar la ilusión, falar, proponer, aldericar y entamar, y siguir construyendo l'espaciu políticu asturianu basáu en valores sociales, l'ecoloxismu, la defensa de lo público y el bienestar del país y la so xente que lleva reclamando munchu tiempu l'asturianismu políticu y que tuvo una de les sos fases, necesaria pero non suficiente, na coalición eleutoral de 22-M”, continúa Huergo. Por ello, Bloque-UNA pon en marcha la iniciativa ‘Xente con compromisu’, “non como un puntu de llegada, sinón de partida, porque queremos abrir l'alderique de cómo tien de ser l'alternativa política que queremos y precisamos y qu’UNA y Bloque vamos contribuyir a construyir”.
Les actividaes previstes pal xueves en La Pola Ḷḷena van principiar a les 13 hores con un actu políticu pa depués, alredor de les 15 hores, celebrar una xinta popular. Bloque y UNA conviden a “toles persones que comparten los nuesos planteamientos” a asistir a la celebración del Día de la Nación Asturiana na plaza d’Alfonso X, na que tamién va haber música tradicional asturiana y delles actividaes.
Efrén d'Andrés
Comentarios
Toos sabemos que a "tou el nacionalismu" nun se va poder arrexuntar, porque los hai osesionaos cola so visión asturtxale de facer nacionalismu, pero paezme que esti proyectu si paga la pena apoyalu.
Na situación na que quedó'l nacionalismu políticu asturianu nes eleiciones pasaes nun dexa abierta más que la puerta p'hacia la converxencia de toles organizaciones nuna sola, del calter que seya: federación, organización única, etc..etc... El resultáu del procesu amosará a les clares si n'Asturies la clas política nacionalista ye como la d'España, ye dicir, dexará ver si esi nacionalismu ye nacionalismu de partíu (importa namás que la organización, la sigla o el réditu políticu enantes que la nación) o nacionalismu de país (primero'l bien del país y depués l'interés de la organización). Suerte pa toos.
«Faigo por vete, peles cais, nos lletreros... faen por borrate, de los mios güeyos y manes... pero nun son quien a ello»
Gracies a estos mazcayos, el P$O€ va siguir afarando Carreño cuatro añinos mas. Que siguien xugando a los barquinos, que ye lo d'ellos.
Yá va siendo hora de tener un asturianismu normal, non venceyao a la estrema esquierda y todes eses mierdes.