La izquierda y los nacionalistes negáronse a votar la modificación de la Constitución aprobada esti vienres

Como s’esperaba, esti vienres aprobóse la reforma del artículu 135 de la Constitución entamada pol PSOE y PP, que namái tuvo l’apoyu d’UPN. La izquierda y los partíos nacionalistes, a esceición de Coalición Canaria, negáronse a votar.
 
La reforma pautada polos dos partíos mayoritarios pa fixar un techu de gastu presupestariu tuvo a final l’apoyu de 316 diputaos por 5 en contra, los dos de Coalición Canaria, el d’UPyD y dos del PSOE que refugaron la decisión del so partíu de modificar la Constitución. Mentes, Izquierda Xunida y los partíos nacionalistes restantes, ERC, PNV, BNG, ICV y Nafarroa Bai, decidieron nun participar na votación.
 
Pela so parte, CiU negoció hasta’l momentu de la votación l’apoyu a la reforma con PSOE y PP, anque al final nun hubo alcuerdu y los catalanes tamién decidieron nun votar. Cola aprobación de la reforma nel Congresu, la modificación d’esti artículu de la Constitución pasa agora al Senáu, que va tramitar la reforma’l miércoles día 7. Toles enmiendes presentaes güei pa solicitar un referéndum foron refugaes.