Xixón acueye una fiesta intercultural con sabor africanu pa recaudar fondos pa Senegal

El tendayu del Muséu del Pueblu d’Asturies va ser sede esti sábadu de la IV Fiesta Intercultural ‘Al ritmo de África’, actividá qu’entama l’Asociación LATE Asturias. Pal vienres ta previsto un alcuentru ente muyeres africanes y asturianes.
 
D’esta forma l’Asociación Los Amigos de Thionck Essyl de Asturias (LATE Asturias) pretende fomentar les rellaciones interculturales y la integración de los ciudanos africanos n’Asturies, amás de recaudar fondos pa la financiación de los proyeutos solidarios que tien en marcha esti coleutivu na población senegalesa que da nome a l’asociación. “Dende l’añu 2008, LATE Asturias celebra cada añu esta Fiesta con unos resultaos escelentes, superando enforma les nueses espectatives. El fundamentu d’esti actu ta na necesidá d’ufrir un espaciu nel que persones de dellos oríxenes puedan establecer redes sociales y brindar la oportunidá a un sector de la población inmigrante de mostrar les sos cultures y realidaes sociales”, espliquen dende esta organización que trabaya tol añu por “fomentar la tolerancia, la solidaridá y el pluralismu, y prevenir actitúes racistes y xenófobes”.
 
La primer actividá prevista pa esta fin de selmana ye la celebración del ‘I Encuentro de mujeres africanas y españolas: Mi historia puede ser tu historia’, prevista pal vienres a les 19 hores nel Centru Municipal Integráu de L’Arena. Mentes, pal sábadu, la fiesta africana va principiar a les 17 hores con actividaes infantiles, pa depués dar pasu, alredor de les 18 hores, a un campeonatu de llucha senegalesa. A les 19 hores va procedese a una preba de té y de dulces d’esti país y, a les 20 hores, va disputase un concursu de baille. Pa finalizar esta fiesta intercultural, a les 20.30 hores va tener llugar una actividá musical. La entrada p’acceder al Muséu del Pueblu d’Asturies ye de baldre.