Foro Asturias Ciudadano tamién va presentase a les eleiciones en Madrid

Foro Asturias Ciudadano (FAC) va competir con Rajoy pol votu de los madrilanos. El partíu de Francisco Álvarez-Cascos, políticu que ta acabante de facer pública la so declaración de bienes, va presentase a les eleiciones en Madrid.
 
Tovía nun se conoz el nome col que va presentase FAC a les xenerales del 20 de payares per Madrid nin si’l partíu pretende dar el primer pasu pa llevar el so proyeutu a otres comunidaes, pero lo que sí ye seguro ye que la formación lliderada por Álvarez-Cascos va pelear por algamar representación nel Congresu y nel Senáu na autonomía que ye sede del Gobiernu estatal. Dende FAC aseguren que la razón que-yos lleva a presentase en Madrid ye “la bona acoyida que ta teniendo” el proyeutu de FAC, “tanto ente los asturianos residentes nel Principáu como énte la numberosa colectividá de ciudadanos braniantes n’Asturias, favoratibles a la iniciativa”.
 
La Comisión Direutiva de FAC marca como oxetivo eleutoral “una victoria nueva n’Asturies”, pa depués destacar “la dificultá d’algamar en Madrid el tope mínimu llegal del 3 por cientu esixíu pa obtener representación nel Congresu los Diputados n’aplicación de la Regla D'Hondt, asina como l’efeutu positivu que pue suponer nel tamañu del grupu parllamentariu los escaños qu’obtenga Foro na capital d’España”. Pa confirmar la presentación del partíu d’Álvarez-Cascos na Comunidad de Madrid han de presentar un 0,1 por cientu de firmes del censu ante notariu, midida qu’esixe la reforma electoral última pautada pol PP y PSOE, dalgo que FAC considera “inconstitucional”.
 
Los bienes d’Álvarez-Cascos
 
El presidente d'Asturies y llíder de FAC, Álvarez-Cascos, fixo pública ayeri la so declaración d'intereses, actividaes y bienes, que pue consultase na web del partíu. Amás de la d’Álvarez-Cascos, apaecen les declararaciones de bienes de los distintos miembros del Gobiernu asturianu, una aición a la que nun tan obligaos por llei.
 
Na declaración de bienes d’Álvarez-Cascos figura un pisu mercáu pola empresa Tecnas en Santander el 10 d'abril del 2008 por valor de 1.367.917 euros, amás del 25 por cientu de propiedaes por herencia del añu 2006 nos conceyos de Valdés y Xixón. En cuatro cuentes bancaries inclúi unos 45.000 euros (16.000 correspuenden a dos de los sos fíos), mientres que tamién fai constar un Plan de Pensiones de 111.412 euros. El llíder de FAC cuenta con un préstamu hipotecariu, del que ye titular la empresa Tecnas por valor de 948.933 euros, amás d'otra cuenta de creitu personal por 60.000 euros. No referente a aiciones, tien 120.000 euros n'Unalia, 3.000 euros en Tecnas y 140 euros nel Real Sporting de Gijón, Sociedad Anónima Deportiva.
 
No que se refier a la so declaración d'intereses y actividaes, dexa claro que nun cobra nada pola so condición de diputáu autonómicu de la Xunta Xeneral nin por ser presidente del partíu Foro Asturias Ciudadano.