Partíos políticos de la izquierda asturiana aconceyaron col comité d'empresa d’Esmena-Mecalux

Bloque-UNA y otros partíos de la izquierda asturiana, como CUPX, Izquierda Anticapitalista, PCPE y PCA, participaron el martes nuna mesa de trabayu col comité d’Esmena-Mecalux. La empresa despidió a más de 40 trabayadores en trés años.
 
L’oxetivu de la convocatoria d’esta mesa de trabayu por parte de comité d’empresa yera’l dar a conocer a estes formaciones polítiques la situación llaboral d’esta fábrica xixonesa, reunión a la qu’hai que sumar otra celebrada’l llunes cola vocera del PP, Pilar Fernández Pardo, que comprometióse a llevar al Plenu la problemática de los emplegaos de la empresa, y otra prevista pa güei cola alcaldesa, Carmen Moriyón. Los otros dos grupos con representación municipal, PSOE y IX-LV, yá tresmitieron la so intención de tratar l’asuntu nel Plenu del 16 de setiembre.
 
En total, según informaron los trabayadores, son más de 40 los despíos que tuvieron llugar nos tres años últimos, un asuntu grave enforma que se torna más cruel tovía si se tien en cuenta que los últimos en quedar ensin puestu de trabayu foron emplegaos en situación de baxa llaboral por enfermedá. Daniel Fernández, voceru de Bloque por Asturies-Unidá Nacionalista Asturiana (UNA) de Xixón, treslladó la solidaridá de la coalición al comité d'empresa y a los trabayadores despidíos, y amosó “la voluntá de sofitar toles iniciatives que realicen éstos pa defender los sos intereses, asina como la resolución d'apoyu del Ayuntamientu de la ciudá que tán negociando coles distintes fuercies con representación municipal, y toes aquelles que puedan realizase dende agora”, señalen los nacionalistes nun comunicáu.