UNA “desixe” al Principáu que na escolarización tenga en cuenta “la llingua materna”

Dende Unidá Nacionalista Asturiana señalen qu'énte’l "reciente anunciu fechu pol Principáu d’Asturies de la creación de 750 nueves places nes escueles del primer ciclu d’Educación Infantil”, espresen el “so esmolecimientu porque vuelva a nun tenese en cuenta la realidá plurillingüe d’Asturies nel usu de la llingua vehicular d’estes escueles y poro, vuelva a afondase nel error de nun tener en cuenta a los escolinos y escolines pa los que la llingua asturiana ye la so llingua materna”.

Dende la UNA remiten a les recomendaciones espresaes pola UNESCO con motivu del Día Internacional del Idioma Maternu, nes que sorrayaben espresamente’l “calter beneficiosu de la enseñanza plurillingüe”, calter que “vien afitáu tamién por abondosos estudios psicopedagóxicos realizaos en families billingües o plurillingües”.

Pa la organización nacionalista ye una “absoluta irresponsabilidá que les primeres estayes educatives supongan, pa los más de los neños y neñes, un choque llingüísticu brutal ente lo que ye la llingua familiar y la llingua de la escuela”. Dende UNA recuerden que les escueles que acueyen a neños col marxen d’edá de los 0 a los 3 años tienen la obligación d’ufierta-y al alumnu un entornu d’adaptación progresiva a lo que será la vida escolar, sorrayando que “tremitiendo-y al alumnáu la idea de que los nomes de les coses anteriores a la escuela yá nun valen, en nengún casu va xenerase un clima de respetu y apreciu pol alumnu o alumna que tenga como llingua familiar l’asturianu o la fala eonaviega”.

Al mesmu tiempu Unidá Nacionalista Asturiana remite a les normatives vixentes nel restu de comunidaes con llingües propies diferentes al castellanu, onde “fai por fomentase l’usu del castellán y la llingua propia, pa que dambos idiomas seyan a sentise como vehículu válidu de comunicación y patrimoniu cultural a valorar”.

La formación pregúntase a la fin “por qué tienen que ser los falantes d’asturianu y fala los que salgan perdiendo siempre nesi procesu educativu d’alquisición de competencies y poro, de desarrollu educativu. Por qué una Alministración que tendría de representar los intereses de tola ciudadanía asturiana nun pue entender una educación billingüe que respuenda d’una vez por toes a la realidá d’Asturies y non a la de los sos propios esquemes mentales”.