La Fundación Juan Muñiz Zapico convoca una edición nueva del concursu de microrrellatos mineros

La Fundación Juan Muñiz Zapico, de CO OO, ta acabante de convocar el VIII Concursu de Microrrellatos Mineros Manuel Nevado Madrid. Nella pueden participar persones de tol mundu que presenten los sos trabayos n’asturianu o castellanu.
 
Esti concursu, que lleva’l nome del históricu llíder mineru antifranquista, ye un referente ente los eventos lliterarios venceyaos al mundu de la minería. Escritores de tol Estáu y Llationamérica manden los sos microrrellatos pa participar nél y optar al primer premiu, compuestu por 500 euros en metálico, un llote de llibros y un grabáu de Manuel Calvo valoráu en 300 euros. Amás, la Fundación Juan Muñiz Zapico tamién premia al meyor escritu n’asturianu con 300 euros en metálico y un llote de llibros valoráu en 200, dalgo que nun quita pa que tolos trabayos fechos en llingua asturiana pueda tamién optar al primer premiu. Otros dos áccesit qu’entrega la Fundación son el de ‘Testimoniu históricu’, pa obres que falen de fechos reales siempre en rellación con conteníos históricos o acontecimientos socedíos nel entornu familiar o llaboral mineru; y el de ‘Mocedá’, pa menores de 26 años –los autores que tengan esa edá deben indicalo xunto al alcuñu del so trabayu, lo que nun quita pa que puedan aspirar al primer premiu–. Los ganadores d’estos dos áccesit van llevase 100 euros en metálico más un llote de llibros con un valor de 150 euros.
 
Los trabayos presentaos han de ser orixinales y cada persona va poder concursar con un máximo de dos. La estensión nun va poder ser mayor de 40 llinies con cuerpu 12 d’una fonte asemeyada a ‘Times New Roman’, y el microrrellatu ha de dir dientro d’un sobre acompañáu d’una plica col alcuñu y los títulos de les obres na so portada, y colos datos del autor nel so interior. El plazu pa unviar los orixinales va allargase hasta’l 21 d’ochobre y el fallu del xuráu, presidíu pol caderalgu Benigno Delmiro Coto, va conocese’l 4 d’avientu coincidiendo cola fiesta minera de Santa Bárbola.
 
Les obres han d’unviase per corréu posta a la direición siguiente: Fundación Juan Muñiz Zapico (Concursu de Microrrellatos Mineros Manuel Nevado Madrid), cai Santa Teresa 15, 33005 Uviéu.