El Movimientu 15-M entama una manifestación en Xixón pal miércoles contra’l “reformazu”

La plaza L’Humedal de Xixón va ser el puntu de salida d’una manifestación convocada pol Movimientu 15-M pa esti miércoles a les 19 hores. El lema de la protesta ye ‘Nenguna reforma más al serviciu del capital”.
 
D’esta forma, los indignaos asturianos van tornar a salir a la cai, nesta ocasión pa protestar contra “la reforma esprés de la Constitución fecha polos grupos mayoritarios PP y PSOE ensin dar tiempu al debate públicu nin a la participación ciudadana”, señalen los responsables del Movimientu 15-M nel país. D’igual forma, reclamen la celebración d’un referéndum, pa lo que tán recoyendo firmes al traviés d’Internet. De momento, tienen más de 115.300 apoyos.
 
Los sindicatos mayoritarios, Unión Xeneral de Trabayadores (UXT) y Comisiones Obreres (CC OO) tamién anunciaron la so intención de movilizase mañana y el xueves per tol Estáu coincidiendo col debate nel Congresu y nel Senáu de la reforma de la Constitución que pretende poner en marcha’l PSOE y el PP pa fixar un techu presupuestariu. Amás, les dos centrales van entamar una gran manifestación en Madrid pal 6 de setiembre.