Doce pasaxeros resulten firíos, tres d'ellos graves, al escarrilar un tren de FEVE en Parres

|

Dos persones resultaron firíes, tres d'elles graves, al escarrillar un tren de FEVE a l'altura de Sotu Dueñes, nel conceyu asturianu de Parres, según informó la compañía nuna nota prensa. L'escarrilamientu del convoi se rexistró el llunes 23 a les 12.25 hores y la compañía ta investigando les causes.
 
Según el 112-Asturies, cuatro persones fueron treslladaes yá al hospital, una d'elles al Hospital Central d'Asturies (HUCA) y les otres tres al Hospital del Oriente. Ente los firíos ta una muyer de nacionalidá inglesa que presenta traumatismu cranial con desgarru cutaneu importante hasta'l cuellu. El so pronósticu ye grave y foi tresllada al  Hospital Central d'Asturies n'Uviéu, nel helicópteru medicalizáu de Bomberos d'Asturies.
 
Con pronósticu grave tamién resultó firida otra muyer que presenta, a falta de más pruebes, traumatismu facial importante y traumatismu torácicu y llumbar. Treslladáronla na UVI-móvil de Les Arriondes al Hospital del Oriente.  
 
A esti hospital evacuóse tamién a un home de 44 años d'edá que sufrió contusión cervical y llumbar. A la muyer treslladáronla na ambulancia de Cangues d'Onís acompañada d'un equipu mélicu dende Les Arriondes.
 
El cuartu firíu treslladáu al Hospital del Oriente ye un home de 49 años d'edá que resultó afeutáu nun hombru. El so pronósitcu ye d'escasa importancia. Igual que'l firíu anterior, a l'home treslladáronlu na ambulancia de soporte vital básicu de L'Infiestu, acompañáu por un segundu equipu mélicu desplazáu dende Les Arriondes.
 
El tren cubría'l trabayeutu Santander-Uviéu y nel momentu nel qu'escarriló llevaba 15 viaxeros nel so interior.
 
Al restu de los viaxeros que diben nel tren y que resultaron sanos y salvos o sufrieron firíes d'escasa consideranza fueron treslladóselos per carretera hasta los sos llugares de destín. La cirulación quedó interrumpida mientres se desarrollen los llabores de retirada del material móvil, sustituyéndose con tresbordos per carretera.
 
El Centru de Coordinación d'Emerxencies del 112-Asturies movilizó a efeutivos de Bomberos d'ASturies con base nos parques de Cangues d'Onís, Villaviciosa y Piloña, amás del grupu de rescate y l'helicópteru medicalizáu de Bomberos d'Asturies. De la mesma manera, el SAMU unvió a la zona la UVI-móvil de Les Arriondes, la UVI-móvil de Llangréu, les ambulancies de soporte vital básicu de L'Infiestu y Llanes y una ambulancia convencional.

Contador Estadistiques