La Sindicatura de Cuentes cumple la sentencia del TSXA y suprime los nomamientos de llibre designación

El BOPA del llunes espublizó la decisión de la Sindicatura de Cuentes de suprimir los nomamientos de llibre designación, según informa’l Conceyu por Otra Función Pública n’Asturies (COFPA). L’órganu cumple asina la sentencia del TSXA.

En concreto, el Boletín Oficial del Principáu d’Asturies (BOPA) rexistra l'alcuerdu del Conseyu de la Sindicatura de Cuentes del Principáu d'Asturies, adoptáu en sesión celebrada'l 1 de xunetu de 2011, por unanimidá, de “dexar ensin efectu na relación de puestos de trabayu oxeto del recursu contenciosu-alministrativu P.O. n.º 317/2009 los relativos a los de llibre designación como sistema de provisión”. D’esta forma, la Sindicatura cumple formalmente la sentencia del Tribunal Superior de Xusticia d’Asturies (TSXA) del 14 de mayu de 2010 , “qu'envaloraba'l recurso interpuestu pol Conceyu por Otra Función Pública n’Asturies, anulando'l sistema dixital de nomamientos pa los puestos de lletraos, auditores, xefe d’alministración y subdireutor de fiscalización, pertenecientes a esi organismu”, según informa l’asociación.
 
Tres facer efectiva la sentencia, la Sindicatura de Cuentes “tendrá d'obrar agora en consecuencia y convocar concursos de méritos oxetivos y non amañaos, poniendo fin a les comisiones de servicios manifiestamente illegales poles que se vienen desempeñando provisionalmente esos puestos hasta la fecha”, añade’l COFPA, qu’entiende que “cualesquier otra solución supondría un intentu fraudulentu pa refugar les consecuencies de la decisión xudicial, que resultaría especialmente alarmante nuna institución con funciones de control de la llegalidá na actuación de l'Alministración pública asturiana”.