Les fiestes d’El Carbayéu viven el so ‘Llunes d’asturianía’

Esti llunes, el barriu avilesín del Carbayéu vive el día últimu de les sos fiestes con una xornada dedicada a la cultura asturiana. Ente les actividaes programaes destaca la entrega del V Concursu de Microrrellatos n’astuarianu.
 
El ‘Llunes d’asturianía’ va principiar con un pasucais de gaiteros al meudía pa depués dar pasu a la cuarta xornada gastronómica na que vecinos y visitantes pueden disfrutar de costilles o de pulpu, ente otros platos, baxo l’horru del parque del Carbayéu. Yá pela tarde, a partir de les 17.30 hores, va celebrase’l IX Certame d’Escanciadores de Sidra, prueba puntuable pal Campeonatu d’Asturies, entamáu en collaboración cola Asociación de Llagareros d’Asturies. Nesta prueba van tar presentes los meyores echadores del país nel tramu final pa decidir al meyor escanciador del país.
 
La sede de l’Asociación de Vecinos ‘El Hórreo’ (cai Dr. Marañón, 16), coleutivo organizador de les fiestes d’El Carbayéu-San Roque, va acoyer a les 18.30 hores la representación de la obra de teatru ‘De l’Argentina a La Pola’, a cargu del grupu Santa Bárbara. Nesi mesmu sitiu va tener llugar, alredor de les 20 hores, la entrega y llectura de los trabayos ganadores del V Concursu de Microrrellatos n’Asturianu, que nesta ocasión foi pa Pablo Rodríguez Medina por ‘Pol amor d’una muyer’, mentes que Vítor Suárez Piñero llevóse’l segundu premiu por ‘Vaya peles ánimes’. Otra manera, a les 19.30 hores, el parque del Carbayéu va tener tamién actividá gracies a l’actuación del grupu de baille Xeitu.  
 
La folixa va continuar tamién pela nueche con una romería na que van actuar la orquesta Alto Standing (21 hores), el Dúo Astur (22 hores) col so espectáculu de música y humor, y Vicente Díaz (00 hores). Tres el conciertu d’esti popular cantante asturianu, Alto Standing va tornar a xubir al escenariu pa facer baillar a tol parque del Carbayéu hasta bien entrada la madrugada.