El FIDO homenaxeó a los marineros en Tapia con un actu emocionante coles gaites como protagonistes

El soníu de les gaites asturianes, gallegues y bretones xuniéronse esti vienres nel mirador d’Os Cañóis n’homenaxe a los marineros. El sábadu va celebrase ún de los eventos más esperaos del FIDO: la Noite Máxica.
 
Ésta yera la segunda ocasión que se celebraba’l ‘Homenaxe a los marineros’ tres l’ésitu del añu anterior, y el públicu del Festival Intercélticu d’Occidente (FIDO) tornó a responder. Nesta ocasión, punxeron la música la Banda Gaites Villa de Mieres, la Banda de Gaitas Atlántida de Matamá y la Bagad Ker Vourdel, nesti orde. Tres l’actuación nel mirador frente a les agües del Cantábricu, les trés agrupaciones desfilaron hasta’l parque de Tapia onde fixeron delles actuaciones y impartieron talleres, ente los que destacó ún de danza bretona.
 
Esta nueche va celebrase la segunda xornada del Murallón Folk, a partir de les 23 hores na sablera del Murallón, nel que van actuar Ayalga, los gallegos The Crass y Peter Browne. El conciertu del músicu irlandés, que tamién va ufrir una charra-demostración d’acordión a les 21 hores nel Auditoriu, ye ún de los más esperaos d’esta edición del FIDO. Mentes, mañana, a la mesma hora y nel mesmu lluga, va celebrase la Noite Máxica, eventu que torna al programa del festival que va consistir nun espectáculu coordináu por Sara López nel que participa’l grupu de teatru Juan Manuel Méndez, responsable d’adaptar el cuentu ‘Xunta de mitos’ del tapiegu Rafael Cascudo. L’espectáculu va completase coles actuaciones de tolos grupos participantes nel certame.
 
La música bretona, protagonista en Xixón
 
El Festival Internacional Xixón 5º 40’ mira güei hacia Breizh al contar con dos actuaciones de bandes musicales d’esta nación celta. En primer llugar, a les 20 hores, van xubir a la Plaza Mayor los astur-bretones Latira, con su reportoriu tradicional asturianu y bretón. Mentes, a les 22 hores, ta previsto’l conciertu de Jacky Molard Acoustic Quartet.
 
Otra manera, en Xixón van continuar les actividaes del Mercáu Tradicional Asturianu, que se celebra hasta’l domingu de 12 a 20 hores en Campu Valdés y Cimavilla, y un monólogu de Carlos Alba ‘Cellero’ entituláu ‘Cellero’l monologuista’, que va representase a les 19 hores na plaza de la Casa Nava.