El CUPA entama una segunda edición de los Cursos Básicos d’Asturianu

Tres l’ésitu de la primer edición, celebrada a primeros d’añu, el Conceyu Universitariu pol Asturianu (CUPA) entama una edición nueva de los Cursos Básicos d’Asturianu. Nesta ocasión, los participantes van poder escoyer ente dos niveles.
 
L’Academia de la Llingua Asturiana (ALLA) y Caxa Rural collaboren col CUPA na organización d’estos cursos que van impartise nel Conseyu de la Mocedá de Xixón, asitiáu na avenía Manuel Llaneza númberu 68. Éstos tán dirixíos a tolos miembros de la comunidá universitaria y ciudadanos en xeneral que quieran averase a la llingua asturiana según el nivel de conocimientu que tengan de la llingua del país. Asina, el CUPA ufre la posibilidá d’escoyer ente’l nivel 1, destináu a aquelles persones ensin conocimientos d’asturianu o con un nivel baxu, y el 2, empobináu a les persones que participaren na primer edición de los cursos o que tengan un nivel mediu d’asturianu y quieran afondar nel conocimientu del idioma.
 
El primer cursu en principiar va ser el de nível 1, el 3 d’ochobre. Ésti va impartise los llunes y miércoles n’horariu de 19 a 21 hores y va finar el 14 d’avientu. Mentes, los de nivel 2 van celebrase los martes y xueves (de 19 a 21 hores) del 3 de payares al 15 d’avientu, con un parón navidiegu pa depués continuar del 10 al 26 de xineru. Dambos cursos van tener una duración de 35 hores llectives. Los interesaos en participar en cualquiera de los cursos han de ponese en contautu col CUPA al traviés del corréu electrónicu conceyuasturianu@gmail.com o nel teléfonu 615.982.816 enantes del 30 de setiembre, nel casu del nivel 1, y del 30 d’ochobre, nel casu del nivel 2. El preciu d’inscripción ye de 30 euros y tolos alumnos van recibir los materiales necesarios pa siguir les clases, como’l manual ‘Xeitu’ asoleyáu pola ALLA.
 
Dende’l CUPA animen a tolos asturianos “a participar nestos cursos que van sirvir pa dar una conocencia básica y adaptada al nivel del alumnáu de la llingua asturiana, deprendiendo les normes ortográfiques, vocabulariu y otres cuestiones, con una clases amenes que van apoyase n’elementos audiovisuales, trabayando tamién cuestiones rellacionaes cola sociollingüística y la cultura d’Asturies”.