La osa fería de gravedá en Ḷḷarón nel mes d'abril va tornar al so hábitat natural tres recuperase dafechu

Cuatro meses depués de ser recoyida por personal de la Fundación Oso Pardo y treslladada a Sobrescobiu pa la so recuperación, la osa fería en Ḷḷarón torna a casa. Va ser reintroducida al so hábitat natural en Fontes del Narcea.
 
Asina decidiéronlos los téunicos de la Conseyería d’Agroganadería y Recursos Autóctonos y los principales grupos conservacionistes xunto con especialistes del Conseyu Superior d’Investigaciones Científiques (CSIC) y de la Universidá d’Uviéu. Con anterioridad a esta cita, tanto les asociaciones como los organismos participantes asoleyaron un informe aconseyando la reintroducción del animal nel mediu natural.
 
La reunión principió con una esplicación sobre l’estáu de salú del animal que dende’l mes d’abril alcuéntrase nel Centru de Recuperación de Fauna Salvaxe de Sobrescobiu. Según los veterinarios encargaos del so cuidáu, la osa completó la curación y presenta un bon estáu xeneral. Por ello, tres decidir que yera’l momentu de que’l plantígredu tornara al so hábitat natural, debatiéronse posibles zones de suelta. Al final, la conseyería decidió la so devolución al Parque Natural de Fontes del Narcea y del Ibias, al entender que se trata del llugar onde la osa habitó dende’l so nacimientu hasta cuando miembros de la Fundación Oso Pardo atopáronla fería y con signos de desnutrición en Ḷḷarón, nel conceyu de Cangas del Narcea.
 
El treslláu de la osa, de 15 meses, al so llar va tener llugar nos díes próximes y nél van participar téunicos de la direición xeneral de Biodiversidá y Paisaxe siguiendo un protocolu detalláu d’actuación fechu pola conseyería y consensuáu con conservacionistes y especialistes. D’igual forma, Agroganadería y Recursos Autóctonos va poner en marcha, al traviés de la viceconseyería de Recursos Autóctonos, un programa de repoblación del osu pardu n’Asturies.