La Comunidad de Madrid califica’l movimientu 15-M de “antisistema, violentu y agresivu”

Regina Plañiol, conseyera de Presidencia y Xusticia de la Comunidad de Madrid, aseguró que’l 15-M ye un movimientu “organizáu, antisistema, violentu y agresivu”. D’igual forma, defendió’l llabor de la Policía nos incidentes de Madrid.
 
En rellación cola imputación de cuatro policíes pola denuncia d'unos de los deteníos nos incidentes de la selmana pasada dientro de les protestes del 15-M, Plañiol, tres la so visita al Banzáu de Valmayor, señaló que los integrantes d'esti movimientu “fixeron un acosu especial y agresión a los miembros de les Fuerces y Cuerpos de Seguridá del Estáu”. Por ello, la conseyera de Presidencia quixo llanzar “un homenaxe y reconocencia” a tolos axentes pol so llabor pa garantizar la seguridá y l'orde públicu de toos “y de forma especial en tolos incidentes relativos a les agresiones violentes que produxeron el mal llamáu movimientu 15-M, porque l'espíritu del 15-M ye una cosa que toos, de dalguna o otra forma, compartimos. Otra cosa ye lo que quedó nesti momentu: ye un movimientu organizáu, antisistema, violentu y agresivu”.
 
La selmana pasada, Madrid foi centru de protestes y manifestaciones tres el desallugu de la Policía, a les 6 de la mañana del martes, de los indignaos que permanecíen na Puerta del Sol y nel Paseo del Prado. Tres trés díes d’incidentes poles cargues de la Policía, que mantenía acordonada la plaza onde ta’l ‘quilómetru cero’ del Estáu, los indignaos consiguieron entrar en Sol na nueche del vienres. Al paecer, la decisión de desallugar a los miembros del movimientu 15-M guarda rellación cola visita del Papa prevista pa la selmana qu’entra.