La Selmana Grande xixonesa principia esti martes con tonada y actuaciones de grupos folclóricos

La Plaza Mayor de Xixón va acoyer esti martes, a partir de les 21 hores, l’aniciu de la Selmana Grande. Elena Corripio y dellos grupos folclóricos van participar nesta primer xornada de folixa na que Manuel Vega-Arango va lleer el pregón.
 
La cantante de tonada Corripio va ser la primera en xubir al escenariu pa interpretar dellos cantares tradicionales pa depués dar pasu al Grupu Folclórico La Alegría, l’Asociacion Coros y Danzas Jovellanos, el Grupo Folclórico Xiringüelu, Coros y Danzas del Real Grupo de Cultura Covadonga, l’Asociacion de Folclrore Azabache, el Grupo Folclórico Xolgoriu, Coros y Danzas Flor de Xaranzaina y l’Agrupación Folclórica Asturiana Los Xustos. Estes formaciones van interpretar nun primer momentu la ‘Danza de Palos de Trabáu’, el ‘Perlindangu’ y la ‘Xota de Cadavéu’, pa depués dar pasu al tambor de Manolo Durán.
 
Darréu, l’alcadesa Carmen Moriyón va saludar a los presentes y el presidente del Sporting, Manuel Vega-Arango, va lleer el pregón. Tres la so intervención, el cantante Víctor Manuel Álvarez González ‘Popi’ va interpretar el 'Xixón del alma' y el 'Asturies, patria querida' y va zarrase l’inauguración de les fiestes llocales col baille por parte de los grupos folclóricos de la ‘Muñeira de Batribán’, 'El Quirosanu' y la ‘Danza de las Tabiernas’.
 
D’esta forma, Xixón abre siete díes de folixa cola Nueche de los Fueos como protagonista principal na medianueche del domingu. Asina, xixoneses y visitantes van poder disfrutar de delles actividaes y conciertos diarios d’artistes de renome na Plaza Mayor (21 hores) y en Poniente (23 hores). Na esplanada xunto a la sablera van actuar esta nueche Quantic y su Combo Bárbara. Mentes, pa mañana tán previstos los conciertos de la Banda Gaites Noega y Juan Perro; el xueves, de Choc Quib Town y Rosendo; el vienres, d’Adanowsky y Fangoria; y el sábadu, de la Gigia Sax Band y la Banda Músicos de Xixón ‘Villa de Xovellanos’ (13 hores, Plaza Mayor), Sly Johnson y la orquesta Los Satélites. Pa zarrar les fiestes, y cola resaca de la Nueche de los Fueos, onde va haber delles actuaciones musicales pela ciudá, el llunes, día grande, los ciudadanos van baillar la Danza Prima na playa San Llorienzu y disfrutar del Restallón a partir de les 14 hores.