L’Sporting pierde y métese nuna zona peligrosa de la clasificación

Anque l’equipu asturianu ufrió una cara meyor na so visita a Villarreal que nel partíu anterior, volvió de vaciu. Al resultáu negativu hai qu’amesta-y los bonos resultaos de los sos perseguidores, lo qu’asitia al Sporting nel puestu decimucuartu con 27 puntos, a solo tres de los puestos de descensu.

Y eso que’l partíu nun pudo entamar meyor. A los 20 segundos l’Sporting yá ganaba 0-1 gracies a un disparu en semifallu de Bilic nel área pequeña. Sicasí mui poco duró l’alegría pa los xixoneses, porque na siguente xugada Rossi fusilaba a Lafuente con disparu duru y secu nel área. D’esti mou, a los 2 minutos el partíu yá taba 1-1 y tocaba volver a empezar. D’esti mou, con un Sporting agresivu y un Villarreal ofensivu, el partíu tuvo abiertu, pudiendo dase cualesquier resultáu. Bilic tuvo’l segundu gol nun cabezazu qu’acabó nel palu. Y d’esi posible 1-2 pasóse al 2-1, porque los valencianos si mandaron el balón a la rede gracies a un cabezazu de Capdevila llibre de marca, algo demasiado habitual nos partíos del Sporting y que-y yá costó dellos puntos.

Na segunda parte los asturianos fueron a pol partíu, sicasí’l Villarreal, col marcador favorable, baxó’l ritmu del partíu, controlándolu más énte un Sporting que lo intentó, pero nun tuvo suerte cara a la portería. De toes formes l’empate pudo llegar si l’árbitru llega a señalar un claru penalti a Canella nel área local. Al final el resultáu nun se movió.

Agora toca esperar esti domingu al Mallorca n’El Molinón, un rival directu na llucha pola permanencia. Ún de los partíos que pueden resultar claves nes opciones pa qu’Asturies siga l’añu que vien con un equipu en primera.

Ficha Técnica

Villarreal 2 - Sporting de Xixón 1

Villarreal: Diego López, Javi Venta, Fuentes, Diego Godín, Capdevila, Senna, Cani, Cazorla, (Eguren m.80) Pires, Rossi (Nihat, m.56) y Llorente (Matías Fernández m.65).

Sporting: Lafuente, Raúl Cámara, Jorge, Neru, José Ángel, Andreu, Pedro (Carmelo, m.61), Diego Camacho, Canella (Barral, m.68), Míchel y Bilic (Maldonado, m.81)

Goles: 0-1, m.1: Bilic. 1-1, m.2: Rossi. 2-1, m.36: Capdevila.

Árbitru: Álvarez Izquierdo (catalán). Sacó tarxetes amarielles a Godín, Fuentes y Javi Venta polos locales y a Jorge, Pedro, Michel y Bilic polos visitantes.