Equo echa a andar el so proyeutu políticu n’Asturies

Tres la eleición de la Mesa de Coordinación Provisional d’Equo Asturies el mes pasáu, esti proyeutu ecoloxista de calter estatal echa a andar nel nuesu país. Eugenia Suárez y Adrián Blanco son los voceros d’esta formación.
 
270 persones inscrites na ‘Equocomunidá’ teníen derechu a votu pa la formación de la Mesa de Coordinación Provisional, de les que 52 yeren militantes de Los Verdes d’Asturies, 57 socies de la Fundación Equo y el restu, simpatizantes. Amás del nomamientu de Suárez y Blanco, tamién s’escoyó a Dolores Hoffman como tesorera. En total, la mesa ta formada por cinco homes y muyeres que yá tán trabayando de cara al conceyu constitutivu d’esta opción política nueva –previsto pal mes d’ochobre en Madrid– que pretende presentase a les eleiciones xenerales.
 
Juantxo López de Uralde, ex direutor xeneral de Greenpeace nel Estáu español, ye’l llíder de la Fundación Equo, xerme d’esti “movimientu políticu y social pa la creación d’un proyeutu políticu que tien como pilares básicos la ecoloxía, la igualdá social, la defensa de los Derechos Humanos y la democracia”. Equo trátase d’un proyeutu abiertu d’estructura federal que se fundamenta nel principiu d’una persona, un votu.