La direutiva de La Cruz de Ciares desentiéndese de la ufierta de facer la ‘Semana Negra’ en Los Pericones

L’Asociación de Vecinos La Cruz de Ciares desmintió que la direutiva del coleutivu propunxera Los Pericones al Conceyu pa instalar ehí la ‘Semana Negra’. D’esta forma desmárquense de les pallabres del martes de Rafael Felgueroso.
 
El voceru del gobiernu dixera ayeri que’l Conceyu de Xixón diba a proponer a Paco Ignacio Taibo II, creador y organizador de la ‘Semana Negra’, otres ubicaciones pal festival distintes a la parcela municipal xunto al campus universitariu, como’l Recintu Ferial o’l parque Los Pericones. Al referise a esti pulmón verde la ciudá, Felgueroso señaló que la propuesta vieno de l’Asociación de Vecinos La Cruz de Ciares, dalgo que la direutiva del coleutivu vecinal quixo desmentir.
 
Cristina Álvarez, secretaria de La Cruz de Ciares, señaló que dende l’asociación tienen constancia de qu’un vecín del barriu comunicara al equipu de gobiernu la posibilidá de llevar la ‘Semana Negra’ a Los Pericones, pero calcó qu’en nengún momentu la propuesta saliera de la direutiva. Amás, apuntó que la celebración de les fiestes de Santiago, qu’entama’l coleutivu vecinal en Los Pericones, yá produz dalguna protesta aislada, polo que nun planteguen el parque como ubicación.