Los Pericones o’l recintu ferial, propuestes de FAC pa situar la ‘Semana Negra’ l’añu qu’entra

Rafael Felgueroso, voceru de la xunta del gobiernu municipal de Xixón, amosó la disposición de FAC de dialogar con Paco Ignacio Taibo II p’atopar una ubicación afayadiza pa la ‘Semana Negra’. Los Pericones ye una de les posibilidaes que señaló.
 
La otra que nomó Felgueroso foi’l Recintu Ferial Luis Adaro, más conocíu como la Feria Muestres, anque esta ubicación tien el problema de la sentencia xudicial qu’obliga a llevar el certame a 500 metros de distancia del edificiu Gacela asitiáu na cai Sporting, frente al fondu sur del estadiu d’El Molinón. “Nin son les úniques, nin son les ciertes; vamos estudiar les posibilidaes”, indicó tres ratificar el compromisu del Conceyu de nun volver celebrar la ‘Selmana Negra’ na parcela asitiada xunto al campus universitariu. Asina lo indicó en rueda prensa nel Conceyu, posterior a la Xunta de Gobiernu, onde se firmaron dos añadíos al conveniu robláu cola organización  del eventu y del Alcuentru de Fotoperiodismu, por importe de 77.200 y 26.600 euros, de manera respeutiva.
 
Felgueroso amosó la so disposición de dialogar con Taibo II ensin imposiciones sobre’l futuru del festival dos díes depués de que’l creador del certame de lliteratura negro punxera trés condiciones pa la continuidá de la ‘Semana Negra’ na ciudá: permanecer na parcela pegada al campus, mantener les mesmes cantidaes de subvención y tener un respuesta enantes del 15 de setiembre. La ‘Semana Negra’ ye un acontecimientu importante pa Xixón, pero “tien qu'haber diálogu ensin imposiciones”, señaló’l voceru, qu’añadió que “lo que nun podemos aceptar dende'l Conceyu ye un ultimátum”.
 
Por último, al esplicar les posibles ubicaciones que se manexen pal festival, destacó que la propuesta de Los Pericones pa celebrar el certame salió de l’Asociación de Vecinos La Cruz de Ciares.