Adif comprométese a que la Variante de Payares tea abierta nel 2012

L’Alministrador d’Infraestructures Ferroviaries (Adif), dependiente de Fomentu, comprometióse a que la variante de Payares tea abierta al tráficu nel 2012. Estos díes hubo rumores sobre un retrasu posible de l’apertura hasta’l 2014.
 
La entidá pública empresarial insistió güei en que mantién los sos planes de operatividá de la Variante de Payares y señaló que’l so compromisu ye abrir esti tramu pal añu 2012 al tráficu de viaxeros y mercancíes. D’esta forma, Adif quixo salir al pasu de les informaciones que poníen en dulda la fecha d’aniciu de la Variante. Según señaló nun comunicáu, la infraestructura “va tener toles carauterístiques téuniques de l’alta velocidá –anchu de vía, gálibos, sistemes de señalización y comunicaciones–”.
 
L’apertura de la Variante va permitir a persones y empreses disfrutar d’un tiempu de viaxe munchu más cortu gracies tamién a la puesta en marcha conexión d’alta velocidá ente Valladolid, Palencia y Lleón, prolongando la comunicación ferroviaria hasta Asturies. Según anuncien dende Adif, la Variante supón un acortamientu de distancies de 33 quilómetros y d’una hora, en tiempu.
 
Otra manera, Adif quixo recordar, ante les crítiques del presidente, Francisco Álvarez-Cascos, pol retrasu supuestu y entender que l’equipamientu de los túneles con un tendíu propiu de trenes convencionales va en contra que la normativa europea y supón una discriminación pa la conexones d’Asturies cola meseta, que la resolución de l’aprobación de la Variante de Payares coles sos carauterístiques asociaes publicóse nel BOE el 21 de febreru del 2003 “tal y como nel so día se diseñó, esto ye, apta pal tresporte de viaxeros y de mercancíes pesaes y industriales, según l’anunciu robláu pol entós ministru de Fomentu, Francisco Alvarez-Cascos”. Asina, describen como “llamativu constatar cómo’l responsable inicial d’esta infraestructura con eses carauterístiques considera agora que la solución de trés carriles ye 'nefasta'”.
 
Tamién cataloguen de “paradóxico que’l presidente del Principáu d’Asturies anuncie agora’l so refugu más rotundu a la Variante con estas carauterístiques cuando un día depués de la so aprobación pol Conseyu de Ministros, Álvarez-Cascos viaxó a Asturies como ministu de Fomentu y protagonizó una conferencia de prensa n’Uviéu pa presentar el proyeutu na que reiteró que la Variante serviría pal pasu mistu de convoyes de pasaxeros y de mercancíes, y cuantificó y identificó los tráficos previstos –productos siderúrxicos, carbón y otres producciones industriales, asina como mercancíes de tresporte combináu o contenedores–”.