Los trabayadores d’ALSA van dir a la fuelga’l 15 d’agostu

Los trabayadores asturianos d’ALSA van dir a la fuelga de manera indefinida a partir del 15 d’agostu. El motivu ye la falta de respuesta de la compañía a les reivindicaciones de la plantiya.
 
Los comités, delegaos de personal y sindicatos CC OO Asturies y UXT Asturies convocaron güei esta fuelga como respuesta a l’actitú d’ALSA ante les sos reivindicaciones. Según anuncien los trabayadores, la empresa incumple los alcuerdos firmaos hai años, el conveniu no relativo a la clasificación de categoríes y el descansu ente xornaes. Tamién señalen qu’esisten quexes diaries de los conductores pa reclamar que se-yos abonen les hores trabayaes y que tolos díes fórmense coles llargues ante les ventanilles pola falta de personal.
 
D’esta forma, los convocantes insisten na xustificación de la fuelga nuna empresa na que “hai más xefes que trabayadores”. Consideren que “toos quieren mandar y naide quier perder el sillón”. Sicasí, señalen que tán abiertos a dir a cuantes reuniones se-yos convoque hasta’l 14 d’agostu, col oxetivu d’iguar tolos puntos que reclamen.