Taibo II pon trés condiciones a Foro Asturias pa la continuidá de la ‘Semana Negra’ en Xixón

Permanecer na parcela pegada al campus, mantener les mesmes cantidaes de subvención y tener un respuesta enantes del 15 de setiembre. Éstes son les trés condiciones que pon Taibo II pa que la ‘Semana Negra’ continúe en Xixón.
 
Una nota firmada pola organización del festival entamáu por Paco Ignacio Taibo II, que peslló ayeri la so vixésimocuarta edición, espresó les esixencies del escritor xixonés pa qu’esti certame siga celebrándose na ciudá onde nació. Trés condiciones que ponen en dulda la continuidá de la ‘Semana Negra’, puesto que la primer d’elles, el continuar na parcela municipal xunto al campus universitariu adaptada a costa fecha pa la instalación del festival paez enforma difícil. L’alcaldesa Carmen Moriyón, de Foro Asturias Ciudadano (FAC), comprometióse col rector de la Universidá d’Uviéu, Vicente Gotor, en qu’ésta sería la primer y única edición del certame de lliteratura negro que diba a celebrase ehí.
 
Según señalen dende la organización de la ‘Semana Negra’ esta edición foi la de mayor afluencia de públicu de la historia, lo que provocó un aumentu del 14,5 por cientu na venta de llibros pese a la crisis que sí afecto a otres festivales como la Feria del Libro de Madrid. Tamién fixo un adelantu del informe d’impactu económicu que’l festival encargó a una empresa independiente de consultoría, Inurrieta Consultoría Integral, que va dase a conocer esta selmana. Esti documentu señala que, frente a una inversión por parte del Conceyu d’unos 263.000 euros, la ‘Semana Negra’ devuelve a la ciudá dalgo más de 10.674.000 euros, lo que supón que por cada euro públicu gastáu, este eventu cultural y festivo da a Xixón 14,7 euros. Otru datu destacable ye l’impactu de la ciudá nos medios de comunicación, que supón cerca de 2.085.000 euros. “La cultura ye l’oxíxenu d’una sociedá en crisis y la ‘Semana Negra’ nun ye cara, sinón baratísima”, afirmó Taibo II.
 
Nengún miembru del gobiernu municipal quixo responder al responsable del festival, anque sí hubo reacciones na oposición. Jorge Espina (IX-LV) teme que “ésta fora la edición cabera de la ‘Semana Negra’ en Xixón”, anque señaló que’l so grupu va pelear tolo posible pa que’l certame continúe na ciudá. José María Pérez (PSOE) afirmó que les condiciones de Taibo II son “perfectamente posibles” y que Xixón “pue y tien” qu’apostar pola permanencia del festival. Mentes, el conceyal popular Pablo Fernández señaló que'l director del certame nun pue poner condiciones nin amenazar a la ciudá.
 
Nin l’alcaldesa nin nengún miembru del so equipo de gobiernu acudieron a la inauguración de la ‘Semana Negra’ nin al debate entamáu’l sábadu con Taibo II con tolos grupos municipales, que coincidieron na necesidá de que’l festival continúe na ciudá. Nel casu de que Taibo II nun llegue a nengún alcuerdu col Conceyu, Avilés podría ser el destín futuru del certame.