Bildu estudia presentar candidatura a les xenerales xunto col PNV y Aralar

Mariano Álava, voceru de Bildu, señaló en Catalunya que la so formación estudia presentase a les eleiciones xenerales con formaciones allegaes, como’l PNV y Aralar. “A ver cómo se posiciona caún”, señaló.
 
En rueda prensa nel Parlament, Álava esplicó que “ye una cuestión non decidida”, pero que, en casu de participar nes eleiciones, la so formación tien esperiencia en facer les coses con toda rapidez depués de que l'autorización del Tribunal Constitucional (TC) pa que Bildu pudiera presentase a les municipales y forales llegara minutos enantes del entamu de la campaña eleutoral. “Seguramente, si tamos, nun vamos tar de la mesma manera. La nuesa presencia tendría otru caráuter”, detalló’l voceru de la formación abertzale, que comentó que podríen solicitar a otres fuercies como Aralar y PNV, coles que Bildu tien cierta afinidá nes reivindicaciones sobre'l derechu al autodetermín y la soberanía, participar xuntes na cita coles urnes, anque remarcó que'l PNV ta un poco lloñe de les aspiraciones del partíu en polítiques sociales. “A ver cómo se posiciona caún”, apuntó Álava, qu'anunció que Bildu va siguir trabayando pa l'acumulación de fuercies.
 
La formación de la izquierda abertzale alcuéntrase estos díes de visita en Catalunya, onde los sos voceros Mariano Álava y Lorena López de Lacalle van dar conferencies en dellos municipios del país convidaos por Solidaritat Catalana per la Independencia (SI) cola fin d’esplicar la so esperiencia de xunidá de partíos políticos a favor de la independencia. Uriel Bertran, secretariu xeneral de SI, señaló que’l so partíu busca la xunidá de tolos independentistes y destacó que la esperiencia de Bildu ye un bon exemplu a siguir.