El Conseyu de Gobiernu escueye como viceconseyeros a José Portilla y Argimiro Rodríguez Guerra

José Portilla González va ocupase de la viceconseyería de Relaciones Institucionales y Argimiro Rodríguez Guerra, de la d’Educación y Formación Profesional. Yeren les dos viceconseyeríes que quedaben por repartir.
 
Portilla (Xixón, 1968) ye Llicenciáu en Derechu pola Universidá d’Uviéu y Diplomáu n’Alta Dirección d’Empresa (PADE) pola escuela de negocios IESE. Profesional con dieciocho años d’esperiencia n’empreses multinacionales nes árees de comerciu esterior, estratexa y desarrollu de negociu internacional nos sectores d’automoción, siderúrxicu y enerxéticu, foi xefe de gabinete del que fora direutor xeneral de Productos Planos d’Arcelor, Guillermo Ulacia, en Luxemburgu, y, depués, responsable de Relaciones Institucionales d’Arcelor-Mittal nel Estáu. Anguaño ye sociu d’una consultoría de estratexa de relaciones institucionales y gubernamentales.
 
Pela so parte, Argimiro Rodríguez Guerra (Llangréu, 1960) ye Llicenciáu en Filoloxía Angloxermánica pola Universidá d’Uviéu. Nel 1983 anició la so carrera profesional como profesor d’inglés nel IES Fernández Vallín de Xixón. Tres pasar por dellos centros educativos, dende 2004 venía desempeñando, como Inspeutor Accidental, les funciones propies del Serviciu d’Inspección Educativa de la Conseyería d’Educación y Ciencia.
 
Mentes, otros nomamientos del Conseyu de Gobiernu d’ayeri foron los de Mónica Sánchez Berián, como direutora xeneral del Ente Públicu de Servicios Tributarios, y de Luis Amadeo Canal Fernández como secretariu xeneral téunicu de Facienda, dambos del área de la Conseyería de Facienda; Marta Álvarez Rodríguez, como secretaria xeneral téunica del organigrama de la Conseyería de Bienestar Social y Igualdá; y a Pilar Castro Pañeda, como direutora xeneral d’Universidaes, y María Candelaria Pereira Ruiz, como secretaria xeneral téunica de la Conseyería d’Educación y Universidaes.
 
Nel área de Sanidá, Alberto Fernández León pasa a ocupar el cargu de direutor xeneral de Salú Pública y Participación; María del Pilar Fernández Fernández, el de direutora xeneral de Planificación y Evaluación; José Antonio Álvarez Riesgo, el de direutor xeneral de Calidá y Innovación nos Servicios Sanitarios; a Juan Azcona de Arriba, el de direutor-xerente del Sespa; y Juan Ignacio Sordo Sotres, el de secretariu xeneral téunico de la conseyería.