Más de 180 persones y coleutivos firmen un manifiestu contra’l Festival Aereu Ciudá de Xixón

La Coordinadora d’ONGD d’Asturies va presentar esti vienres nel rexistru del Conceyu de Xixón un manifiestu contra’l Festival Aereu de Xixón. Más de 180 persones y coleutivos firmaron esti documentu que reclama “una sociedá llibre d’exércitos”.
 
“Nunos díes la bahía xixonesa enllenaráse de públicu ante’l festival aereu, escaparate del militarismu”, señalen dende la Coordinadora, que recuerda que “dalgunos de los aviones que participaron n’ediciones anteriores pa deleite de la ciudadanía y visitantes, güei sobrevuelen Libia nuna intervención militar na qu’al menos 2.000 salides d’aviones de la OTAN terminaron en bombardéu”. Tamién critiquen l’altu coste que tien esti festival en tiempos de crisis, con un gastu pal Conceyu de Xixón de 38.500 euros, 6.000 más que l’añu pasáu, a lo qu’hai que sumar les perres procedentes de patrocinios.
 
Amás de la entrega del manifiestu mañana, a les 11 hores, nel rexistru municipal, documentu onde encamienten al Conceyu de Xixón “a que s’oponga a la realización d’eventos de carauter militar na ciudad y trabaye por una sociedá llibre d’exércitos”, la Coordinadora va realizar una serie d’aiciones de cai anti-belicistes el domingu a les 11 hores, coincidiendo cola celebración del festival, nos Xardinos de la Reina.