El Bancu d’Alimentos d'Asturies repartió más de mil tonelaes de comida nel primer semestre del añu

La Fundación Bancu d’Alimentos d’Asturies aumentó la so actividá de manera considerable nos seis meses primeros del añu. Nesti tiempu, la institución benéfica repartió 1.332.000 quilos de comida ente 14.830 persones necesitaes.
 
Esta cantidá supón un aumentu del 210 por cientu con respeuto al mesmu periodu del 2010, cuando’l Bancu d’Alimentos recibió y distribuyó 632.000 quilos. “Esta xuba débese de manera principal al aumentu del númberu d’empreses, centros educativos y supermercaos que collaboren de forma activa col Bancu d’Alimentos d’Asturies, ensin olvidar a los voluntarios, cada vez más, y a la solidaridá de los asturianos”, apunten dende la institución benéfica. Ente los collaboradores de la Fundación destaquen, pola so aportación, los conceyos de Sieru, Uviéu y Xixón, y el Gobiernu d’Asturies, amás de la Fundación Antón Cerqueda, Caxastur, La Caixa, Banco Herrero, Fundación Alimerka, Rotary Club d’Uviéu, Masymas, Carrefour, Alimerka, Eroski y Alcampo.
 
Les previsiones pal segundu semetre del añu del Bancu d’Alimentos ye continuar ampliando la so actividá hasta llegar al repartu de 2.000 tonelaes de comida y ampliar un 5 por cientu’l númberu d’empreses y entidaes collaboradores, pa lo que necesitaríen de diez nuevos voluntarios. Esta insitución benéfica tien como oxetivu principal l’ayuda a xente necesitao mediante la recoyida de los escesos d’alimentos de delles empreses y instituciones, y la collaboración de los ciudadanos nes ‘operaciones quilos’ entamaes pola Fundación.