Los Hermanos Valle Roso y Héctor Braga van amenizar el Mercáu Tradicional de Murias

La población ayerana de Murias va celebrar esta fin de selmana’l so XIII Mercáu Tradicional, qu’esti añu amplíase un día. Los Hermanos Valle Roso, el trío Santos-Varela-Caleya y Héctor Braga van actuar nesta folixa.
 
El Mercáu, que va tar dedicáu a les supersticiones y la maxa, va inaugurase’l sábadu, a les 19 hores, cola presencia del alcalde del conceyu, David Moreno Bobela, actu tres que los presentes van poder disfrutar d’un pasucais protagonizáu pol grupu Tatatachán. Dende esi momentu, les persones que s’averen a Murias van poder disfrutar de numberosos puestos d’artesanía instalaos a lo llargo del pueblu, amás de dellos talleres.
 
La xornada del sábadu va completase cola actuación de los Hermanos Valle Roso, Marisa y Fernando, presente y futuru de la canción asturiana, a partir de les 22.30 hores, y con un espectáculu protagonizáu pol fueu que lleva’l nome de ‘El arca de las leyendas’ y que va principiar a medianueche. Darréu, el tríu Santos-Varela-Caleya va facer baillar al públicu con música tradicional hasta bien entrada la madrugada.
 
Tres una nueche de folixa, l’actividá nel Mercáu va tornar el meudía del domingu. Pa les 12.30 hores, la capiella Virxe de les Nieves va acoyer una misa solemne con gaita y tambor y, darréu, va celebrase la puya’l ramu. El Grupu Folklore Ayerán va actuar a les 13.30 hores, mentes qu’Héctor Braga y la Bandina’l Bache van percorrer Murias llevando la so música a tolos rincones del pueblu. Pa recargar fuercies tres una llarga nueche y una mañana activa, la organización va convidar a toles persones que s’averen hasta esta población ayerana a xintar paella.
 
Yá col banduyu enllenu, los más pequeños van poder convertise per una tarde en ‘pequeños artesanos’ y presenciar l’espectáculu de títeres ‘Entre juegos anda el miedo’, a les 19 hores, mentes los pas disfruten del pueblu y del so Mercáu Tradicional, que va pesllar con una actuación d’Héctor Braga a partir de les 20 hores.