Un 44 por cientu de los llectores d’Asturies.com confíen nes intenciones de Cascos pa cola llingua

La intención de Francisco Álvarez-Cascos de desarrollar dafechu la Llei de Promoción y Usu del Asturianu/Bable foi bien recibida pol 44 por cientu de los llectores d’Asturies.com. Consideren que ye un pasu importante pa la nuesa llingua.
 
Mentes, un 32 por cientu de los nuesos usuarios creen que les pallabres del presidente nuevu del Gobiernu nun debate del Plenu d’Investidura “son un xestu pa la galería” y que, en realidá, “vamos dir a peor, como amuesa que’l chinu vaya tener más rangu na educación asturian’. Otru sector importante, un 24 por cientu, optó pola otra opción del nuesu ‘Conceyu Abiertu’ que va nuna llinia paecía a l’anterior, anque nesti casu señalen que nun va haber retrocesos y que la Política Llingüística de Foro Asturias Ciudadanos namái “va ser una continuidá de la del PSOE’.
 
Dende güei, los nuesos llectores van poder votar una nueva encuesta en ‘Conceyu Abiertu’, que nesta ocasión va entrugar a los nuesos llectores qué opinión tienen del nuevu conseyeru de Cultura y Deporte, Emilio Marcos Vallaure, del que va depender la Política Llingüística.