FAC retruca a la FSA-PSOE que’l so grupu parllamentariu tien más muyeres que’l ‘socialista’

En FAC nun sentaron bien les acusaciones de la FSA-PSOE pola poca presencia de muyeres nel Gobiernu. Enrique Álvarez Sostres, voceru de FAC, retrucó a Carmen Sanjurjo que’l so grupu parllamentariu tien más muyeres que’l ‘socialista’.
 
La secretaria d’Igualdá de FSA-PSOE declaró ayeri que na formación de Gobiernu de FAC “hai una involución clara que los socialistes llamenten” en comparanza con Executivos anteriores onde señaló que sí había paridá. “Produz risión que s'acuse al Gobiernu d'Asturies de clara involución na composición d'un gabinete sin paridá cuando'l mesmu grupu parllamentariu socialista tien nes sos files a siete muyeres, frente a les ocho que tien el grupu parllamentariu de FAC”, señaló Álvarez Sostres, que señaló que tamién hai que “tener en cuenta que l'Executivu d'Álvarez-Cascos ta formáu por menos conseyeríes que'l d'Areces, colo que nun se pue calificar como significativa la reducción del númberu de muyeres”. Na llexislatura anterior había cuatro muyeres en diez conseyeríes, por trés en nueve de l’actual, unes cifres mui similares.
 
Álvarez Sostres tamién recordó al PSOE que nun tuvo problema nengún en sacrificar la presidencia de la Xunta Xeneral sofitando a Fernando Goñi y rompiendo asina “con 12 años de continuidá nos qu'esi cargu desempeñólu una muyer”, María Jesús Álvarez.