La LV FIDMA va abrir les puertes al públicu’l sábadu 6 d’agostu

El Recintu Ferial Luis Adaro yá ta preparándose p’acoyer una edición nueva de la Feria Internacional de Muestres d’Asturies (FIDMA), que cumple 55 años. Ésta va principiar el 6 d’agostu y va reunir a 2.000 espositores de cinco continentes.
 
Con un índiz de repetición d’estos espositores del 80 por cientu, la FIDMA repite la mesma fórmula d’años anteriores. Según pallabres de Luis Arias de Velasco, presidente de la Cámara de Comerciu de Xixón, esti modelu ta más que consolidáu y permitió a la Feria Muestres convertise na mayor feria multisectorial d’Europa en tamañu y númberu d’espositores, namái superada pola de París. Sicasí, en tiempos de crisis, afirmó que la FIDMA nun se llibra de recortes.
 
Esti añu, les actividaes nel recintu ferial van allargase del 6 al 21 d’agostu. El vienres, día 5, ta previsto l’actu inaugural, a les 20 hores, nel salón d’actos, mentes que les puertes a los visitantes van abrise’l sábadu a les 11 hores. Como ye vezu, nestes 16 xornaes va celebrase delles xornaes especiales, como’l Día de Llangréu, el de la Tercera Edá, la Xornada de les Muyeres Empresaries, el Día del Comerciu y del Centru Asturiano de Madrid, amás d’eventos como la entrega de los Premios ‘Urogallos de Bronce’.