Fernández señala que ye “difícil” atopar “puntos d’alcuerdu” con FAC pa los presupuestos nacionales

La FSA-PSOE taría dispuesta a apoyar los presupuestos nacionales “si lo que presenta FAC ta en relación col interés xeneral d’Asturies”. Sicasí, el so secretariu xeneral, Javier Fernández, asegura que ye “difícil” atopar “puntos d’alcuerdu”.
 
Les posiciones que mantién FAC n’asuntos de importancia clave, como la Sanidá y la Educación, son pa Fernández una distancia mui importante, según señaló’l llíder del PSOE n’Asturies enantes de reunise con responsables orgánicos de La Mesa, en Grau, acompañáu pola secretaria de Política Municipal, Adriana Lastra, y pol secretariu d’Organización, Jesús Gutiérrez. “Si lo que presenta FAC de cara a los presupuestos ta en rellación col interés xeneral d’Asturies, nun habría inconveniente en que contara col apoyu de los socialistes. Lo qu’ocurre ye que les posiciones tán mui alloñaes en dalgunos aspectos como les privatizaciones o cómo s’enfoca la Sanidá o la Educación, o lo que tien que ver cola fiscalidá”, alvierte Fernández, pa quien l’alcuerdu resulta “difícil” dao les posiciones diferentes “d’unos y otros en principios programáticos”.
 
Amás del tema de los presupuestos, Fernández tamién faló de la perda de fondos europeos, dalgo que, señaló, yá se sabia: “Nun contestu de converxencia cola Xunión Europea depués de la incorporación de nuevos socios, habría un recorte de fondos”. “A partir d’agora hai un cambiu básicu na direición de los recursos, y más qu’a les infraestructures, van a tar dirixíos a procesos d’anovación o teunoloxía, polo qu’habrá que ser rigurosos y avanzaos pa dir per esi camín y conseguir fondos”, destacó.