El Fapas acusa a la Xunta de Galicia de querer anexonar 100 hectarees de territoriu asturianu

El Fondu Asturianu pa la Proteición de la Fauna Salvaxe (Fapas) criticó la persecución que sufre por parte de la Xunta de Galicia pol allinamientu d’una águila pescadora en territoriu asturianu. El país vecín entiende qu’eses tierres son gallegues.
 
La zona concreta son 100 hectarees de la ría del Eo que Galicia considera propies, según esplicó la organización al traviés d’un comunicáu. Pa demostralo, les autoridaes gallegues presentaron un documentu cartográficu desvinculáu del Ministeriu de Fomentu y del Instituto Nacional de Cartografía, que sí consideren esos terrenos asturianos como se reflexa nos mapes oficiales. Una actitú, la de la Xunta de Galicia, qu’indigna a l’asociación que trabaya pal caltenimientu de la naturaleza.
 
La polémica ente Galicia y el Fapas principió cola acusación de la Diputación de Lugo de que’l coleutivu capturara una águila pescadora en Galicia con artes prohibíes. Por ello, propunxo una sanción que va de los 60.000 a 6.000 euros, a la qu’agora se suma una denuncia efectuada pola mesma Xunta de Galicia ante'l Serviciu Provincial de Costes de Lugo. El motivu ye la ocupación de terrenu públicu al asitiar la trampa. “L'acosu al Fapas intensificóse a partir del momentu en qu'un altu cargu de la Xunta de Galicia dirixóse personalmente a la Delegación de Costes pa presionar na execución de la denuncia presentada”, esplicó l’asociación, que defende que capturó y marcó l'ave en territoriu asturianu, pa lo que tenía tolos permisos alministrativos necesarios.
 
Ante esta situación, el Fapas estudia yá presentar una querella contra la Xunta de Galicia y, na so representación, contra los axentes forestales de la Conseyería de Mediu Ambiente en Lugo, por facer falsa denuncia señalando como gallegu un territoriu asturianu.