El Conseyu de Gobiernu de la Universidá d’Uviéu aprueba l’usu del asturianu nes tesis doctorales

Na mañana d’esti martes, el Conseyu de Gobiernu de la Universidá d’Uviéu aprobó’l Reglamentu d’Estudios de Doctoráu. Ésti inclúi la posibilidá d’usar l’asturianu tres la modificación del borrador de la norma.
 
Alredor de les 14.30 hores terminó la reunión del Conseyu de Gobiernu de la Universidá d’Uviéu nel que s’aprobó’l testu definitivu del Reglamentu d’Estudios de Doctoráu. Como s’esperaba, al final l’asturianu va tener el mesmu rangu que les llingües oficiales de la Xunión Europea y toles persones que quieran van poder presentar la so tesis doctoral en llingua asturiana.
 
D’esta forma, l’artículu polémicu –el 25 2.a, del capítulu 3, seición primera– que dexaba fuera la posibilida d’emplegar l’asturianu queda asina nel Reglamentu: “La memoria que recueye’l llabor fechu na tesis doctoral redactaráse n’español. Sicasí, la Comisión de Docotoráu va poder autorizar la so redaición n’otru idioma oficial de la Xunión Europea, previu informe de la Comisión Académica del Programa de Doctoráu, y siempres que se garantice que los miembros del Tribunal tean en condiciones de xulgala. Nesti casu, la memoria ha contener el resume y les conclusiones n’español. Coles meses condiciones, y d’alcuerdu col artículu 6.2 de los Estatutos de la Universidá d’Uviéu, la redaición podrá facese en llingua asturiana”.