L'Asociación Cultural N’Ast ve urxente “la visibilidá de la hestoria asturiana nes enseñances medies”

La falta de conteníos propios nos manuales y programaciones didáutiques nos IES asturianos esmolez a N’Ast. Esta asociación cultural ve urxente “la visibilidá de la hestoria asturiana nes enseñances medies”.
 
“Con motivu del piesllu del cursu académicu y de los cambios políticos que nesti momentu ta viviendo’l nuesu país, dende l’Asociación Cultural N’Ast queremos reclamar que se supere l’actual situación d’invisibilidá de la hestoria asturiana nos manuales escolares”, apunten nun comunicáu nel que recuerden que n’Asturies, país asitiáu nel grupu de territorios con un currículum educativu qu’afita que los conteníos propios na educación han de ser d’un 35 por cientu sobre’l xeneral–por un 45 por cientu de les comunidaes que s’autocalifiquen como ‘nacionalidaes históriques’–, los “manuales y programaciones didáutiques que s’utilicen nos IES asturianos en rara ocasión lleguen al 10 por cientu”. Amás, estos conteníos siempre se dan “a lo cabero de la programación”, polo que na mayor parte de les ocasiones nun lleguen nin siquier a tratase en clase.
 
N’Ast considera que’l problema d’esta falta d’enseñu de la hestoria propia nun ye namái “cuantitativu, sinón cualitativu: la hestoria del país que se da ye mínima y probe, de tala manera qu’Asturies nun apaez reconocida como una sociedá singular a lo llargo del tiempu, sinón como una anéudota carente d’entidá propia”. Asina, el coleutivu pon como exemplu que “casi paez qu’ente Pelayo y los ilustraos del sieglu XVIII nun esistió una realidá socio-territorial asturiana con personalidá propia”. “Pa nós l’enseñu de la hestoria tien que dir empobináu a la formación de ciudadanos críticos, conocedores del pasáu coleutivu de la so sociedá, polo que reivindicamos un cambiu urxente nel sistema educativu; que s’implanten unos conteníos calidables qu’algamen el 35 por cientu del currículu xeneral”, finalicen dende l’asociación cultural.