Ana Cano: “Doi un votu de confianza a Emilio Marcos Vallaure”

Ana María Cano, presidenta de l’Academia de la Llingua Asturiana (ALLA), tien bones sensaciones cola eleición d’Emilio Marcos Vallaure como conseyeru de Cultura y Deporte. “Doi-y un votu de confianza”, asegura.
 
“Tien una trayeutoria mui importante que lu avala como conseyeru de Cultura”, continúa Cano, que valora de manera positiva les pallabres de Vallaure na toma de posesión del so cargu. Nelles, l’hasta agora direutor del Muséu de Belles Artes daba prioridá pa esta llexislatura a la proteición del Prerrománicu y la llingua asturiana. “Son dos elementos claves dientro de la cultura asturiana”, apunta Cano al respeuto, qu’espera que Vallaure “siga una política llingüística acordies a les necesidaes del asturianu”.
 
La presidenta de l’ALLA asegura que ye necesaria “una política llingüística bien planificada, con unos oxetivos claros a curtiu, mediu y llargu plazu, un presupuestu afayadizu y un sistema pa evaluar los avances”. “Hai que facer que la llingua sía normal”, añade Cano, pa quien el final de tou esti procesu ye “llegar a la cooficialidá”. D’igual forma, la profesora universitaria destaca la importancia “de que les élites sociales y económiques, el presidente y los conseyeros, falen en llingua asturiana” pa que la xente vea normal l’usu del idioma.
 
Otra persona que tien bones pallabres sobre Vallaure ye Ramón d’Andrés, presidente de la Fundación Caveda y Nava, que, nuna valoración a títulu individual, afirma que’l conseyeru de Cultura y Deporte “ye una persona que permite tener enfotu nél”. El de Cayés, patrón d’honor de la Fundación dende 2003, cuando’l profesor universitariu yera secretariu de la entidá, “ye un gran conocedor de la cultura asturiana, como avala la so trayeutoria, y yá mostró en delles ocasiones la so posición favoratible a la normalización del asturianu”, apunta D’Andrés.