El CUPA va participar na Tertulia Enrique García-Rendueles

Inaciu Galán, presidente del Conceyu Universitariu pol Asturianu (CUPA), va participar esti xueves na Tertulia Enrique García-Rendueles. Esti coleutivu ta d’actualidá pol so trabayu pa que la Universidá permita presentar tesis n'asturianu.
 
La cita de la tertulia qu’entamen l’Asociación Cultural N’Ast y l’Atenéu Cultural Xuan María Acebal, va tener llugar, como ye vezu, a les 20 hores de mañana nel xixonés Centru Social L’Ayalga. Na so intervención, Galán, miembru tamién de la Comisión de Normalización Llingüística del Asturianu, va esplicar la historia del CUPA y el trabayu desendolcáu pol coleutivu que preside nos años últimos pa la normalización de la llingua del país nel ámbitu universitariu. Tres la so intervención va haber un alderique ente tolos presentes.
 
El CUPA foi ún de los coleutivos más activos nel trabayu pola modificación del borrador del Reglamentu d’Estudios de Doctoráu, que nun incluyía la posibilidá de presentar tesis doctorales n’asturianu. Mañana’l Conseyu de Gobiernu de la Universidá d’Uviéu va aprobar una redaición nueva d’esti Reglamentu onde va modificase l’artículu nel que nun apaecía la llingua asturiana, dalgo a lo que se comprometío’l rector, Vicente Gotor, el vienres pasáu colos representantes del CUPA nuna reunión.