Miguel Ángel Forascepi arrenuncia a la viceconseyería d’Educación por motivos de salú

Un día depués de que’l Gobiernu d’Álvarez-Cascos diera a conocer el so nomamientu como viceconseyeru d’Educación y Formación Profesional, Miguel Ángel Forascepi arrenunció al cargu. L’inspector d’Educación alega motivos de salú.
 
Forascepi comunicó ayeri per carta al presidente d’Asturies el so arrenunciu irrevocable al cargu por motivos de salú. Nella l’inspector d’Educación estimó a Francisco Álvarez-Cascos l'enfotu depositáu na so persona, anque les circunstancies tórguen-y aceptar la responsabilidá que trae'l cargu. El que diba ser futuru viceconseyeru deseó “los mayores ésitos” al llíder de Foro Asturias Ciudadano “pol bien de la nuesa querida Asturies”, según informó’l Gobiernu.
 
Otra manera, cinco viceconseyeros de les siete viceconseyeríes que planificó Álvarez-Cascos tomaron güei posesión de los sos cargos col compromisu de trabayar “a trés turnos y en tándem” colos sos conseyeros respeutivos. Toos prometieron lo sos cargos, a esceición de Jesús Rubio (Política Sectorial), qu’optó por xurar. El restu de viceconseyeros del Gobiernu entrante son Carlos Prieto (Comunicación), Luis de la Vallina Martínez de la Vega (Sector Públicu), Juan Vega Alonso (Infraestructures) y Luis Peláez Rodríguez (Recuros Autóctonos). Queden tovía ensin responsable al cargu les viceconseyeríes de Relaciones Institucionales de Presidencia, y de Educación y Formación Profesional tres l’arrenunciu de Forascepi.