Goñi señala que la Xunta Xeneral va ser “un órganu decisivu” nesta llexislatura

El presidente de la Xunta Xeneral, Fernando Goñi, aseguró que la Xunta Xeneral va ser “un organu decisivu” nesta llexislatura. El popular cree que la Cámara va tener protagonismu al nun haber nenguna mayoría nel Parllamentu.
 
“Va ser un llugar d’alcuentru, de consensu, de debate y cambiu d’impresiones”, reseñó Goñi, que tamién incidió en que “los gobiernos, los parllamentos, les instituciones, nun tán más que pa dar solución a los problemes de los ciudadanos”. Por ello, defendió qu’ante la coxuntura actual, Asturies “necesita alcuerdos”.
 
D’igual forma, Goñi apuntó que “tien qu’haber voluntá clara por parte del Gobiernu y de tolos diputados” d’algamar esos alcuerdos pencima de “les diferencies posibles” y al marxe de la convocatoria de les eleiciones xenerales. El presidente de la Xunta Xeneral fixo estes declaraciones na inauguración del cursu ‘Logros e incertidumbres de la Unión Europea’, qu’entama la Escuela Asturiana de Estudios Hispánicos na residencia de La Granda. Ésti principió güei, va desarrollase hasta’l xueves, y ta dirixíu por Paz Andrés Sáenz de Santa María, catedrática de Derechu Internacional Públicu y Rellaciones Internacionales de la Universidá d’Uviéu.