Álvarez-Cascos reduz el númberu de viceconseyeríes a siete

El primer Conseyu de Gobiernu d’esta llexislatura, celebráu na tarde del vienres, aprobó la creación d’un total de siete viceconseyeríes. Ello supón reducir en trés el númberu de viceconseyeríes del Gobiernu anterior.
 
Asina, va haber viceconseyería de Comunicación, que va tar dirixida por Carlos Prieto; de Sector Públicu, por Luis de la Vallina Martínez de la Vega; Política Sectorial, por Jesús Rubio Dorca; Educación y Formación Profesional, por Miguel Ángel Forascepi Roza; Infraestructures, por Juan Vega Alonso; y Recursos Autóctonos, por Luis Peláez Rodríguez. La sétima viceconseyería ye la de Relaciones Institucionales de Presidencia, que tovía nun tien persona al so cargu.
 
Otra manera, el Conseyu de Gobiernu, al amparu de la Llei de Puertos del Estáu y de la Marina Mercante (Llei 27/92), nomó a Emilio Menéndez Gómez como presidente de la Autoridad Portuaria de Xixón, y a Raimundo Abando Tartiere como responsable máximu de la d’Avilés. Amás,van ser vocales del Puertu de Xixón José Manuel Rivero Iglesias (conseyeru d’Economía y Emplegu), Luis de la Vallina Martínez de la Vega (viceconseyeru de Sector Público), Carmen Alsina Arizaga y Miguel Ángel Conde León; y Ramón del Riego Alonso (conseyeru de Facienda y Sector Público), Albano Longo Álvarez (conseyeru d’Agroganadería y Recursos Autóctonos), Pablo Sánchez Lorda y Enrique Fernández Pérez, del d’Avilés.