Vallaure da prioridá a la proteición del asturianu y del Prerrománicu

El conseyeru de Cultura y Deporte nuevu, Emilio Marcos Vallaure, señaló na toma de posesión del so cargu que’l so oxetivu principal va ser protexer “tol patrimonio cultural” d’Asturies. Dio prioridá al Prerrománicu y a la llingua asturiana.
 
Vallaure señaló que’l patrimoniu históricu asturianu ta “en mui mal estáu” y aseguró que’l so oxetivu “fundamental” y “prioritariu” va ser protexer “tol patrimoniu cultural”, de manera especial el Prerrománicu y l’asturianu, asina como les instituciones asturianes. El tovía direutor del Muséu de Belles Artes, puestu que va dexar pronto, señaló qu’afronta’l so cargu nuevu con “tola ilusión” y añadió que va trabayar polos intereses d’Asturies, dalgo que siempre foi “el norte” de la so vida.
 
Tamién resaltó que’l Gobiernu d’Álvarez-Cascos pue ser “un revulsivu” p’Asturies. “Tamos toos ilusionaos. Agora hai qu’estudiar bien cómo ye la situación pa entamar a trabayar”, comentó. Otra manera, el conseyeru apuntó que’l so departamentu va analizar la situación del Campu San Francisco, yá que considera que ye “evidente” que se trata d’un parque “históricu” que debe conservase “de forma impecable”.