Les fiestes d’El Carmín de La Pola viven el so día grande cola romería nel prau La Sobatiella

La Pola Siero va acoyer esti llunes a romeros procedentes de toda Asturies pa celebrar El Carmín. Ésta ye la segunda fiesta más prestosa d’Asturies pa los nuesos llectores, namái superada pola Fiesta les Piragües.
 
La folixa más multitudinaria d’Asturies, que se reparte ente Les Arriondes y Ribeseya, foi escoyida polos llectores d’Asturies.com como la más prestosa del branu asturianu al sumar un 24 por cientu de los votos, mentes qu’El Carmín algamó un 20 por cientu. San Timoteo, la fiesta de Ḷḷuarca tuvo un 13 por cientu d’apoyos, y el Xiringüelu, en Pravia, un 3 por cientu. Sicasí, la mayor parte de los nuesos usuarios apostaron por otres de les munches folixes qu’hai nel nuesu país en branu, como pue ser la Descarga de Cangas o’l Descensu Folclóricu del Nalón, ente otres munches. Asina, un 40 por cientu votó la opción ‘otros’.
 
Les persones que quieran disfrutar de la romería de güei nel prau La Sobatiella van poder facer usu de los servicios nocherniegu de Feve pa tornar a casa y asina evitar garrar el coche. Dende La Pola van salir trenes en direición a Uviéu a la 1, a les 3 y a les 5; a Xixón, a les 1.05, 3.05 y 5.05 hores; y a Nava, a les 2 y 4 hores.