Los conseyeros d'Álvarez-Cascos tomen posesión esti llunes

Los nueve conseyeros del Gobiernu nuevu d’Asturies, presidíu por Francisco Álvarez-Cascos, van tomar posesión na mañana d’esti llunes. El llíder de FAC prometió’l so cargu’l sábadu con un discursu nel que tornó a llamar país a Asturies.
 
L’actu de posesisón va principiar a les 13 horas, según información facilitada por Foro Asturias Ciudadano (FAC). Nél van participar los nueve conseyeros –ún menos que na llexislatura anterior– qu’anunciara’l vienres Álvarez-Cascos na segunda xornada de votación pa la Presidencia del país. Éstos son Florentino Alonso Piñón (Presidencia), Ramón del Riego (Facienda y Sector Públicu), José Manuel Rivero Iglesias (Economía y Emplegu), Paloma Menéndez (Bienestar Social y Igualdá), Ana Isabel Álvarez (Educación y Universidaes), Álvaro Longo (Agroganadería y Recursos Autóctonos), María Isabel Marqués García (Fomentu, Ordenación del Territoriu y Mediu Ambiente), José María Navia-Osorio (Sanidá) y Emilio Marcos Vallaure (Cultura y Deporte).
 
El nomamientu más esperáu pal asturianismu yera’l de la Conseyería de Cultura, pa la qu’Álvarez-Cascos escoyó a una persona que ta considerada sensible pa cola cultura asturiana y la normalización del asturianu. Emilio Marcos Vallaure (Cayés, 1941) ye direutor del Muséu de Belles Artes dende 1995, onde dende la so fundación, nel 1980, trabayó como secretariu téunicu y conservador. Con estudios en Derechu y en Filosofía y Lletres, tamién foi direutor artísticu de las coleiciones d’Arte y Turismu de la Editorial Everest, de Lleón, del 1966 al 1976. Tres esta esperiencia llaboral, Vallaure ocupó’l cargu de direutor de Patrimoniu Artísticu de la Conseyería de Cultura y Deportes del Consejo Regional de Asturias (1979-1980). Hai que destacar que’l conseyeru nuevu ye miembru d’honor de la Fundación Caveda y Nava.
 
Otra manera, Álvarez-Cascos tomó posesión el sábadu como presidente nuevu d’Asturies. Nel so discursu refirióse a Asturies como país en dos ocasiones y aseguró que va trabayar pa que los asturianos tengan voz en Madrid. “Como tolos asturianos, tenemos la cabeza n’España y nel mundu; el corazón n’Asturies, y los pies nel suelu. Vamos lluchar porque n’España se sienta y se respete la nuesa voz, y puedan decidir los nuesos votos pa facer una Asturies meyor pa tolos asturianos, que comience por tresformase nuna Asturies d’acoyida más que de dispidida pa los sos fíos”, señaló’l presidente nuevu del país.
 
Amás, Álvarez-Cascos faló del “fechu rexonalista asturianu” avaláu pola “peculiaridá histórica, xeográfica, alministrativa, cultural y llingüística” d’Asturies y fixo referencia a Asturies como país cuando declaró que “los ministros del Gobiernu d’España nun solo son bienveníos a esti país, sinón que van presidir tolos actos a los que tengan a bien acudir nel Principáu”, y que “el país” que yá dirixe “aspira a competir coles demás ensin ser privilexada nin marxinada”.