Palacios denuncia que “el bloquéu d’Israel llega a les costes mediterránees de la Xunión Europea”

Rafael Palacios y Miguel San Miguel, activistes de la Flota de la Llibertá, criticaron en Xixón la complicidá de la comunidá internacional con Israel. El de Ciañu denunció que’l bloquéu israelín “llega a les costes mediterránees de la XE”.
 
Los dos activistes participaron nuna rueda de prensa conxunta entamada pol Comité de Solidaridá cola Causa Árabe y pola Coordinadora Asturiana d’ONGD na carpa d’alcuentros de la Fiesta de les Asociaciones que ta celebrándose estos díes na playa d’El Natahoyo de Xixón. Palacios y San Miguel taben acompañaos por Adrián Redondo, de la Coordinadora, encargáu de presentar l’actu, y Marcos Cienfuegos, direutor en funciones de l’Axencia Asturiana de Cooperación al Desarrollu, que foi’l primeru en tomar la pallabra. Na so intervención, Cienfuegos destacó que “nun se cumplió l’oxetivu final, pel momentu, de frayar el bloquéu inxustu a Palestina d’Israel col silenciu de la comunidá internacional”, pero destacó “la victoria d’una batalla” por parte de los activistes del ‘Gernika’.
 
“Les dos iniciatives que punxeron en marcha n’Atenes –la ocupación pacífica de la Embaxada estatal na capital griega y la fuelga de fame– de los nuesos compañeros sirvió pa lliberar el barcu y tola ayuda humanitaria que llevaba. Too gracies a la perseverancia de los nuesos compañeros”, aseguró. Pa finar, señaló la so esperanza en que la Organización de Naciones Xuníes (ONX) incorpore na so asamblea xeneral del 15 de setiembre a Palestina como un estáu llibre independiente –al igual que fixeron ayeri con Sudán del Sur– tres la petición cursada pol Gobiernu palestín.
 
San Miguel principió denunciando “la soledá internacional del pueblu palestín. Al igual que la canción de Víctor Manuel del poema de Garfias, ‘sola en mitad de la tierra’. Ésa ye la situación de Palestina anguaño”. Sicasí, destacó l’apoyu de la “sociedá civil” y la contribución económica “d’organizaciones políticas y sindicales, y de persones a títulu individual” pa poner en marcha la II Flota de la Llibertá, qu’aseguró que nun va ser la cabera. Ésta, según recordó, tuvo compuesta de 12 barcos nes que collaboraron 52 países, embarcaciones que sirvieron pa poner el focu mediáticu nel bloquéu israelín a Palestina. “Ello llevó a que tres de nueso tuviera la Policía griega y española, y servicios secretos como’l Mossad y la CIA, nun procesu d’entorpecimientu constante a la nuesa misión”, aseguró.
 
Un exemplu de la persecución que vivieron los activistes del ‘Gernika’ foi l’argumentu qu’utilizaron les autoridaes griegues pa impedir la salida del barcu cargáu con ayuda humanitaria pa Gaza del cai de Kolymbari, na islla de Creta. “La Grecia democrática fixo usu d’una llei de la Dictadura de los Coroneles que prohibe la llibre circulación per agües griegues”, afirmó San Miguel, que considera una “traxedia que predominen los intereses del mercáu que los de la solidaridá”.
 
Pela so parte, Palacios denunció que “el bloquéu d’Israel llega a les costes mediterránees de la Xunión Europea” y recordó que’l ‘Gernika’ navegó por agües griegues enantes de que les autoridaes griegues secuestraren el barcu en Kolymbari. “Tuvimos 18 díes acosaos, perseguíos, nun primer momentu por coches civiles con ocupantes que nos siguíen y fotografiaben. Lo más fuerte foi cuando dos fragates llegaron al puertu: una punxóse proa contra proa, y la otra na bocana del puertu. Inclusive, llegaron al cai camiones militares”, llamentó.
 
Esta situación llevó a los activistes, a esceición de siete que quedaron en Creta pa cuidar el barcu y la carga –“compuesta por material escolar, médicu y de construcción col oxetivu de reconstruir viviendes derribaes polos israelinos”– mentes que’l gruesu del grupu viaxó a Atenes. “Fuimos a la Embaxada a entregar una carta na que pedíamos proteición y amparu al Gobiernu estatal y que presionara a Grecia pa que’l barcu navegara en llibertá, siempre de forma pacífica”, apuntó’l de Ciañu, que mostró la so indignación ante l’actitú d’Asuntos Esteriores y del embaxador, l’asturianu Miguel Fuertes. “Nun primer momentu’l tratu foi cordial, pero col pasu del tiempu principió a insultanos”, apunta Palacios, que relató cómo llegó un momentu, mientres taben de fuelga de fame, nel que mandó a tolos activistes a una sala con un calderu y negó-yos la posibilidá d’utilizar el bañu de la Embaxada. Una situación poco agradable que terminó cola lliberación del ‘Gernika’, anque non cola carga, que quedó nel puertu d’El Piréu, n’Atenes, de manera temporal baxo custodia de les autoridaes griegues.
 
Pa terminar, San Miguel y Palacios quixeron destacar la participación de ciudadanos xudíos na Flota de la Llibertá pa dexar nidio la diferencia ente’l Gobiernu d’Israel y quienes lu sofiten col pueblu xudíu. Asina, señalaron que’l 25 por cientu de la tripulación del barcu estauxunidense de la Flota de la Llibertá yeren xudíos, ente les que destacaba una muyer de 90 años sobreviviente del Holocaustu y que nel ‘Gernika’ tamién viaxaron dos muyeres xudíes. Tamién recordaron la disposición del barcu con activistes del Estáu español, ante les acusaciones isrealines de que tresportaba material de guerra, pa que cualquier país certificara la carga del barcu. Suecia foi l’únicu que se declaró favorable a facelo.