El Garrapiellu punxo marcha a Cuadonga dende Xixón

Esti vienres, a les 8 hores, salieron de la ponte de piedra de Deva con direición a Cuadonga los andariegos de la Tertulia Cultural El Garrapiellu. Per delantre queden-yos 75 quilómetos de camín per una sienda de gran belleza.
 
Ésta ye la vixesimoprimer vegada qu’El Garrapiellu entama’l trayeutu pela sienda que xune Xixón y Cuadonga travesando los conceyos de Villaviciosa, Piloña y Parres, que ta marcada gracies al esfuerciu d’esta Tertulia Cultural. Los miembros del coleutivu dispusieron trisqueles –tamién nomaos garrapiellos– pel camín y dellos cartelos de madera pa que toles persones que quieran percorrer la ruta que llega’l santuariu de Cuadonga puedan facelo ensin mieu a perdese. Con esti trabayu, El Garrapiellu, asociación que ta acabante de recibir la medaya de plata del Conceyu de Xixón, busca potenciar esta sienda “como posible motor económicu de les fasteres rurales asturianes peles que pasa, atrayendo un turismu secañosu de cultura y paisaxe”.
 
D’igual forma, a los miembros de l’asociación tamién-y prestaría “que valiere como noyu de desendolcu llaboral pa la xente moza, afitando asina población nos amenorgaos pueblos asturianos”. Un exemplu del llabor que tuvo faciendo El Garrapiellu por da-y un emburrión a la ruta ye l’entamu próximu de les obres p’habilitar un área recreativa en Sorribes, una petición vieya de la Tertulia Cultural al Conceyu de Piloña que va ser realidá pronto y que va permitir a los andariegos facer un bon descansu nel so camín.
 
Tres la salida de Deva esta mañana, les persones que participen na Marcha Andariega-cultural a Cuadonga van facer nueche en Sietes, pa mañana tomar camín hacia Llames de Parres. Va ser el domingu cuando los miembros y simpatizantes d’El Garrapiellu van llegar a Cuadonga.